ANG kagamhanan sa dakbayan sa Sugbo magtukod og temporaryong classrooms sa Barangay Sapangdaku aron magamit sa naundang nga klase sa Sapangdaku Elementary School.
Niadtong Biyernes, ang principal sa tunghaan nisuspenso sa mga klase human mosuyla ang Guadalupe river human sa pagbunok sa uwan.
Nahimutang ang tunghaan sa kilid sa sapa.
Sa usa ka emergency meeting nga gipatawag sa Cebu City Local School Board, nasabutan nga ang tunghaan balhinon tungod sa kakuyaw sa kasamtangang nahimutangan niini.
Si Department of Engineering and Public Works (DEPW) chief, Jose Marie Poblete, niingon nga ang temporaryong mga school classroom tukuron sa luna nga gipanag-iya sa kagamhanan nga mao ang basketball court.
“The transferring of the school to a permanent place is easier said than done so as an immediate action, we will construct a temporary school,” sulti ni Poblete sa Sun.Star Cebu.
Ang bag-ong dapit mas luwas matod ni Poblete kay nahimutang kini kilid sa main road. Duna kiniy gidak-on nga 450 metro kwadrado.
Ang DEPW nag-andam na sa pagpalambo sa dapit human sa inspection nga gipangulohan ni Poblete kagahapon.
“We just have to flattened first the ground and then we can start the construction,” dugang ni Poblete.
Apan bisan pa ning mao nga kalamboan, si Poblete niingon nga hayan naa gihapoy kakuwang sa classrooms sa Sapangdaku Elementary School tungod sa kagamay ra sa luna.
Sa sinugdanan, nagplano ang DEPW sa pagtukod og walo ka classrooms nga gama sa light materials.
Iyang gipasabot nga ilang gipili ang light materials tungod kay kini temporaryo ug mapaspasan ang construction.
Base sa report, ang principal niduso ngadto sa local school board nga magtukod og 13 ka mga classroom aron masulod ang tanang mga klase.
Samtang magpadayon ang pagtukod, ang Siyudad niawhag sa school administration ug sa barangay sa pagpatuman sa ilang disaster action plan kon gikinahanglan samtang ang klase ipahigayon sa naandang tunghaan. (RVC sa Sun.Star Cebu)