KAPIN sa tunga sa milyon ka pesos nga kantidad sa gituohang shabu nasakmit sa kapulisan gikan sa usa ka babaye nga tigpayuhot og ginadiling drugas atol sa buy bust operation sa mga sakop sa Lapu-Lapu City Police Intelligence Branch.

Ang CIB nga gipangulohan ni Senior Insp. Rogelio Pineda Jr. nakadawat og report labot sa pagpamaligya og shabu sa Barangay Poblacion, diin usa ka babaye ang gitumbok nga namaligya.

Ilang gipanid-an ang suspek ug nasuta nila ni Pineda nga positibo hinungdan nga nipahigayon silag buy bust operation inabagan sa mga sakop sa Philippine Drug Enforcement Agency-Central Visayas (PDEA-7) niadtong Biyernes sa hapon sa may merkado publiko. 

Ilang nasikop si Aprilyn Plaza Rolea, 25, dalaga, taga Barangay Casuntingan, dakbayan sa Mandaue.

Nakuha sa kapulisan gikan sa posisyon sa gikatahapan ang duha ka plastic nga gituohang shabu nga mokantidad og P48,000.

Samtang laing duha ka mga dagkong plastic nga ang sulod gituohan gihapong shabu nga mokantidad og P480,000 nasakmit usab sa kapulisan.

Matod ni Pineda nga dugay na silang naniid sa kalihukan sa suspek ug gumikan sa pagkasikop niini, iyang napanglantawan nga monihit na usab ang supply sa shabu sa dakbayan sanglit ang operation sa suspek sa tibuok dakbayan sa Lapu-Lapu.

Ang suspek gitanggong na sa Lapu-Lapu City Police Office samtang tukmang kaso ipasaka na ugmang adlawa.

Sa laing buy bust operations, nasikop usab sa kapulisan ang laing duha ka mga babaye sa dakbayan sa Sugbo niadtong Biyernes.

Ang Regional Anti-Illegal Drugs Special Operations Task Group (Raidsotg) 7 nakadakop kanila ni Fara Ruflo ug Medelyn Cabilao, pulos taga T. Padilla Extension, Siyudad sa Sugbo mga alas 5:10 sa hapon.

Nakuha gikan kanila ang duha ka medium packs ug walo ka small packs sa white crystalline substance nga gituohang shabu nga balor og P10,000.

Si Senior Insp. Henrix Bancoleta sa Raidsotg 7 niingon nga napakyas sila pagdakop kang Raymund Ruflo, usa ka level two drug pusher, nga maoy subject sa operasyon.

“Nilayat siya sa bongbong unya wala na namo makit-i,” matod niya sa Sun.Star Cebu.

Si Raymundo igsuong lalaki ni Fara ug kapuyo ni Medelyn. (Dugang taho ni DSM sa Sun.Star Cebu)