UPAT ka mga lalaki nga dunay dalang mga mahait ang butang ang gibitbit sa mga barangay tanod ngadto sa presinto sa kapolisan mga alas 3:00 sa kaadlawon sa Barangay 35 ning siyudad sa Cagayan de Oro.

Pinangulohan ni Ronnel C. Ligtas, barangay tanod gidala paingon sa Police Station 2 (PS2) sa Cogon sila si Albert Agawin, 31, minyo, ug Beboy Pesma, 21, ulitawo, residente sa Barangay 34 ning siyudad; Mohaymen Novo, 36, minyo, taga 30-31 St., Barangay Nazareth ug Jeffray Genobatin, 42, minyo, lumulupyo sa St. Jhon Puntod ning siyudad.

Nasikop ang mga suspetado atol gipahigayong mobile patrol sa mga tanod sunay sa bag-ong giimplementar nga curfew sa siyudad.

Ug wala usab nila damha nga aduna kini sila marecover nga 3 ka sachets sa giituohang shabu kon ginadiling druga.

Gisuway pagkuha sa Sunstar Superbalita ang parte sa mga suspetsado apan kasamtangan kini silang gipa-drug test.

Kasamtangang detinado ang mga suspetsado sa PS2 ug gidala sa crime laboratory ang mga nakuhang gituohang druga. (KCS)