KRITIKAL ang usa ka babaye nga nadala sa Northern Mindanao Medical Center (NMMC) ning siyudad human kini dunggaba sa kaugalingon niining bayaw mga alas 4:15 sa hapon niadtong milabayng adlaw.

Ang biktima naila nga si Cristin Lala-an, 43, minyo ug lumulupyo sa Patulangan, Impasug-ong, Bukidnon.

Duha ka samad dinunggaban ang naangkon sa biktima sa walang bahin sa iyang bukton ug ilok hinungdan sa kakuyaw nga kahimtang niini.

Gisaysay ni Lala-an nga samtang gikan kini siya sa trabaho naabtan na lamang niya ang suspetsado nga iyang bayaw nga nakainom ug maoy pagkakita niya nga gisingkahan ang iyang anak.

Ang suspetsado giila nga si Allan Ybañez, hingkod ang pangidaron ug lumulupyo sa susamang dapit.

Dugang pa niini nga iya lamang kining gisita apan gidunggab siya niini ginamit ang mahait nga kutsilyo hinungdan nga dali kining gidala sa balay tambalanan ning siyudad.

Sa pagsulat ning balita, kasamtangang giatiman pa sa mga doktor sa NMMC ning siyudad ang biktima ug gisunod na sa kapolisan sa Bukidnon ang maong panghitabo.

Samtang lain usab nga biktima sa kasong pagpangdunggab ang natala sa NMMC ning siyudad niadtong milabayng adlaw sa Cogon ning siyudad.

Gidala sa Rescue 411 si Reden Esmerio, 34, residente sa Barangay 33 ning siyudad sa nasangpit nga balay tambalanan human usab dunggaba sa iyang kaugalingong pag-umangkon.

Subay pa sa biktima nga samtang nakita niya kini nga nag-inom na usab igo lamang kini niyang giingnan nga undangon na ang maong bisyo apan nasuko kini ug dayong dunggab kaniya.

Samad sa walang bahin sa iyang likod ang naangkon sa biktima.

Sa pagsulat ning balita gawasnon pa ang giingong suspetsado.