GIKLARO sa Department of Social Welfare and Development Northern Mindanao (DSWD 10) nga walay kamatuoran nga adunay raffle o mga promo ang Pantawid Pamilyang Pilipino Program o mas naila sa 4Ps.
Gibutyag ni Oliver Inodeo sa 4Ps sa rehiyon nga ilang gialerto ang ilang mga miyembro nga dili basta basta motuo sa mga nangawas nga report kalabot sa pa raffle.
Ang report nga miabot sa buhatan sa DSWD nagikan sa text gikan sa usa ka Lyka Ramirez nga adunay cellphone number nga 0926-9124816. Adunay unod ang text message nga: "Congratulations, from President Noy-Noy Aquino Foundation 4Ps Pantawid Pamilyang Pilipino Program, your sim # won P950,000 as second prize winner in the Handog Pangkabuhayan raffle promo per DTI Permit No. 9513, series of 2013. Please call me now, I am Lyka Ramirez."
Ang kinsa mang' makadawat sa susamang mensahe giawhag nga itaho sa DSWD 10
Ang 4Ps usa ka cash assistance ngadto sa mga pobre nga pamilya alang sa ilang edukasyon, panglawas ug supply sa nutrisyon. (SVB)