DUNGAN sa pagpatuman sa curfew ning siyudad sa Cagayan de Oro aduna usab gikatakdang i-proposed nga ordinasa kalabot sa silot sa mga ginikanan nga giingong nagpasagad sa ilang responsibilidad ngadto sa ilang mga anak.
Kini ang gibutyag ni Konsehal Eric Salcedo, chairman komite sa Social service sa konseho ug midugang nga iyang nakita nga daghan sa mga ginikanan ang gatalikod sa ilang mga responsibilidad ug daw itugyan na lamang ilang mga anak sa mga kamot sa gobyerno.
Matud niini nga daghan sa mga ginikanan ang nalimot sa ilang responsibilidad.
Sa maong ordinansa kalabot sa pagmatuto o pagsilot sab sa mga ginikanan dako og papel ang mga Barangay Council for the Protection of Children (BCPC) diin ang barangay maoy nasayod sa mga kapasidad sa mga ginikanan diha sa pag-atiman sa ilang mga anak.
Gipanawagan usab ni Salcedo ang tanan kapitanes nga lihokon ug i-organisa ang BCPC alang ning gikatakda nga ordinansa. Ang mga ginikanan adunay multa nga P500 sa unang kasupakan, P1000 sa ikaduha ug P1500 sa ikatulo.
Kon dili makabayad niini mohimo og community service. Apil sa ordinansa ang pagtudlo sa mga ginikanan sa ilang mga anak nga bantayan ug dili maglakaw lakaw sa kadalanan atol sa kagabhion labina ang gobyerno concern kaayo sa kaugmaon sa katawhan.
Dugang ni Salcedo nga ang maong ordinansa iya na nga gisango ngadto sa Comission on Human Rights (CHR) ug ingon man sa Department of Social Welfare and Development (DSWD). (SVB)