NAKABSAN sa kinabuhi ang usa ka lalaki human giingong gipusil sa wala mailhing' lalaki pipila ka metro ang kalay-on gikan sa abandonadong' balay nga gipuy-an niini sa Vamenta, Barra, lungsod sa Opol, Misamis Oriental.

Giila ang biktima nga mao si Ariel Caralde, 28, ulitawo, lumad nga taga Johndorf, susamang barangay ug lungsod.

Si PO3 Jonathan Eduave sa Opol Police Station nibutyag nga nakit-an nila ang nagbuy-od nga patayng lawas sa biktima kinsa naligo sa iyang kaugalingon nga dugo sa 15 metro ang kalay-on gikan sa abandonadong balay nga posibleng gipuy-an niini.

Sulod sa abandonadong balay ilang namatikdan nga posibleng gikan adunay nag-pot session sa sulod niini tungod sa mga nakitang mga aluminum foil.

Nakita sab gikan sa pouch sa biktima ang mokabat 30 ka mga empty sachet nga sudlanan sa gituohang shabu, kwarta nga nagkalain-laing' kantidad nga mokabat og P500, usa ka motorsiklo, ug hunting knife.

Matud ni Eduave nga ila pa nga imbestigahan ning panahona kung unsay mga kalambigitan sa biktima ug sutaon ba ang taho nga posibleng kalambigitan sa ginadili nga druga hinuon padayon pa nga gisuta.

Si Dr. West Edquila kinsa maoy nangulo sa Scene of Crimes Operatives (Soco) niingon nga basi sa pagsusi niini sa patayng' lawas, ang biktima posibleng unang gipusil sulod sa abandonadong balay ug nakadagan pa paingon sa gawas sa puloy-anan ug didto naulotan ug nakabsan sa kinabuhi.