Cobras lupig sa Scorpions; 4th ra sa FilOil Cup

GIPAKITA sa Centro Escolar University (CEU) Scorpions nga mas la ang ilang hilo kumpara sa Cebu-based Southwestern University (SWU) Cobras pinaagi sa pagposte og 73-58 nga kadaugan kagahapon sa inilugay sa ikatulong dapit sa FilOil Flying V Hanes Premier Cup sa FilOil Flying V Arena.

Gipagawas sa Scorpions ang ilang kamangtas sa 3rd quarter diin ilang gilupig sa pinuntosay ang Cobras, 26-11, nga nakahatag kanila og 15 puntos nga labaw.

Ang kadaugan gipangulohan ni Samboy De Leon pinaagi sa iyang 22 puntos samtang niamot og 19 puntos si Mon Abundo.

“Nung sa una nahirapan pero naka-depensa naman kami. Nag-focus po kami sa depensa kasi doon po talaga kami nanalo,” asoy ni De Leon.

Midominar ang Scorpions sa rebounding, 50-33, ug gawas niini, nakapasulod sab sila og 11 ka three-pointers sa 27 ka mga itsa.

Ang Cobras gipangulohan ni Landry Sanjo pinaagi sa iyang 16 puntos, nidugang og 16 puntos si Ahmed Mohammed samtang nitampo og 11 puntos si Mark Tallo.

Sa laing duwa, naangkon sa De La Salle University (DLSU) Green Archers ang kampiyunato pinaagi sa pagpukan sa San Beda College (SBC) Red Lions, 71-66.

Kini maoy ikatulong titulo sa Green Archers sulod lang sa usa ka tuig. Sila sab ang ningkampiyon sa University Athletic Association of the Philippines (UAAP) ug Philippine Collegiate Champions League (PCCL).

Si Jeron Teng sa Green Archers maoy napiling MVP sa Filoil tournament.