NASUROY ko sa Barangay Tapul niadtong Sabado. Usa ni sa mga bukirang barangay sa dakbayan sa Talisay nga nagkinahanglan og pagtagad sa mga opisyal sa city hall.
Sa akong paglibot sa maong barangay mao ni ang akong nadiskubrehan. Dunay mga bahin nga apiki ang karsada nga aspaltado ug sementado.
Apan naglabi ang lapukon ug libaong apil na ang karsada padulong sa Tapul Elementary ug National High School. Grabe ka guba sa karsada.
Nakapangutana ko kon sakop ba sa Talisay City ning baryoha nga wala man kay makita nga timailhan sa pag-asenso. Daplin sa karsada sa usa ka bahin akong nakita kining mga binantal nga basura. Mga pinilian diay kadto sa mga mamasurahay gikan sa dumping site nga nahimutang sa sitio Napo Purok 1 ug gipatimbang.
Matod ni Kapitana Mary Anne Nolasco, napulo na ka tuig sukad nga gihimong labayanan sa basura ang Tapul. Sa ato pa, ang mga basura nga makolekta gikan sa mga barangay sa patag adto ilabay sa Tapul. Ang tanang baho ipasimhot sa taga Tapul. Kaluoy sab.
Sagdi na lang kay sa sinugdanan ang mga molupyo gipasaligan ug gisaaran man kaniadto og humot nga kaugmaran. Kay kamo may han-okan sa tanang basura ug mosimhot sa tanang baho sa Talisay, paninduton sa city hall ang tanang karsada sa barangay. Ayudahan ang uban pang panginahanglan sa barangay sama sa panglawas ug edukasyon sa mga bata.
Halos nalang tanang nindot ug humot gisaad pero kutob ra sa saad ang tanan. Sa giingon ko na nagpabiling wala matagad ang ilang karsada. Naa pay high school nga way bungbong. Naay eskwelahan sa elementarya sa sitio Hawanay Purok 8 ang grade 1 hangtod sa grade 6 nagklase lang sa upat ka room. Ang pasabot nag-ipon ang grade 1 ug grade 2, grade 3 ug grade 4 ug ang grade 5 ug grade 6. Unsa may makat-onan ini sa mga bata? Labayanan pa og basura sa edukasyon wala tagda. Pait.
Ang di sab nako masabtan kay way bisan usa sa mga molupyo didto ang nakapahimulos sa Pantawid program sa gobiyerno. Ang silingan nila nga mga barangay sama sa Maghaway, Manipis ug Jaclupan pulos magdawatan og pinansyal nga ayuda ang mga kabus didto.
TRAPIK
Sa mga wala mosayo og biyahe, ayaw mo kahibulong nganong hinay kaayo ang dagan sa trapiko. Magklase na ang mga pribadong eskwelahan sugod karong adlawa. Hibalo na tang daan basta tingklase ang gidaghanon sa mga sakyanan sa karsada madungangan ug ang gidak-on sa karsada mao lang gihapon, unsaon nato pag-abot og sayo sa atong destinasyon? Pun-an pa sa ulan nga usahay maatol sa oras nga tingsakay.