SAYON ra ang pagpanaway kay galabaw sa kadaghan ang mga hanggaw nga wala’y buot sa ilang buluhaton. Sayod ta nga sagad lisod pagpakgang sa mga buloyagon. Mao nga samot pod ang atong pagbagutbot, labi na kon lupig pa’y nahubsan ta sa paglaom ug dili na ganahan mobulig sa mga gituohan natong takos sa atong pagsalig. Kapila na kaha naunlod sa atong pina­hangad nga pagtan-aw ang pi­pila sa atong mga tinugyanan sa balaod? Ay, dili pod ta mabasol kon nganong gakatol kanunay atong pahak matag higayon nga palandongan nato ang kahimtang sa atong kahapsay ug kalinaw.

Patay ra tingali mao’y maayo kay wala na’y mabuhat nga makakurat. Apan, pwera buyag, padayong buhi atong pagtuo nga naa gihapoy mga tinugyanan nga angay sa atong pagtahod ug pasidunggog bisan pa’g gapatuyang gihapon ang ubang mga badlongon. Ug kay mao ra’g ang kabanha ug kaluhag sa binuang dali kaayong mopawani sa mga gahilom sa ilang pagtinarong, angay lang gyod natong isangyaw ang talagsaon nga pagtuman sa ilang tahas hangtod sa atong pasidungog ug pagtahod.

Dalaygon gyod ang pamatuod sa tigdumala sa Project Lantern nga gipasiugdahan sa International Justice Mission (IJM) dinhi sa Sugbo aron abagan ang kagamhan sa pagsumpo sa higanteng suliran nga sagad gabiktima sa mga batan-on. Nasayran nato nga kining paninguha sa IJM nga pakgangon ang sex trafficking binuligan sa Bill and Melinda Gates Foundation isip pagsuta sa usa ka pangagpas— gamay ra ang kabatan-onan nga mapahimudsan sa mga bugaw ug mga butakal nga langyaw kon ipahamtang ang mga balaod batok sa human trafficking. Ug tuod man, nibungat ang IJM nga nadan-agan kuno ang paglaom nga makunhoran ang mga uwagan sa unod nga linghod, labi na kay gakugi gyod kuno ang kapolisan sa Sugbo sa gikinahanglan nilang makat-onan nga “specialized training” gikan sa ginsakopan sa IJM nga mga abogado, social workers, ug community activists. Kini mao’y hinungdan nga nikunhod kuno og 79% ang pamorikat sa kabatan-onan dinhi sa Sugbo. Gikataho nga gikan pa sa 2001 hangtod sa niaging tuig, ang mga tinugyanan sa balaod nakatabang sa IJM pagluwas sa 1,175 ka mga biktima sa human trafficking ug uban pang matang sa panamastamas samtang nadakpan ang daghang mga mga suspetsado hangtod sa pagkabilanggo sa pipila. Sa ato pa, duna’y hayag nga kapadulngan ang pagpatuman sa balaod kon, sama sa gipadayag sa IJM, ang bulohaton pinasikad sa kusganon nga tumong.

Sulondon pod ang pulis nga ligdong gapasunod sa pinitik sa dughan alang sa mga pinasagdan bisan taliwala sa mahagiton nga pagsubay sa maayong binuhatan. Sigon pa sa lain natong nasayran, nahimo kuno sa kanhing hepe sa Fuente Police Station ang pagtultol sa maayong dalan alang sa mga batang libod-suroy. Giingon nga si Chief Insp. Michael Anthony Bastes, nga karon nabalhin na sa dakbayan sa Toledo, nakadasig kuno sa mga mga batan-on.