GIPASAKA sa Office of the Ombudsman niadtong miaging Biyernes ang kasong plunder ug kalapasan sa Anti-Graft and Corrupt Practices Act batok nila ni Senador Juan Ponce Enrile, Ramon “Bong” Revilla Jr. ug Jinggoy Estrada atubangan sa Sandiganbayan, ang anti-graft court.

Naglakip sa gipasakaan og kaso mao si Janet Lim Napoles, ang giingon utok sa P10 bilyunes nga pork barrel scam nga naglambigit sa daghang mga magbabalaod.

Mapriso na gyod kaha ang tulo ka mga senador? Kanus-a man sab kaha? Atong atangan.

***

Ang Sandiganbayan adunay lima ka division. Ang Fourth Division nga gipangulohan ni Justice Gregory Ong ni-inhibit na sa kaso nga naapil si Napoles human mogawas ang taho nga kaila sila ni Napoles.

Sa sunod pang semana i-raffle ang maong mga kaso sa nahibiling upat ka mga division ug ang division nga makadawat sa kaso mohimo pag judicial declaration una pa moluwat og mga order de arresto batok sa tulo ka mga senador, ni Napoles ug kaubanan.

Sa ato pa, di madali ang pagkapriso ning tulo ka mga senador ug ni Napoles.

***

Kon atong basihan ang nahitabo sa unang mga high-profile cases, nilanat og tulo ka semana una pa makaluwat ang Sandiganbayan og order de arresto batok kang kanhi presidente Joseph Estrada nga gipasakaan sab og kasong plunder ug nakonbikto gyud sa katapusan apan gi-pardon ni kanhi presidente Gloria Macapagal-Arroyo.

Samtang nilanat og tulo ka buwan una makaluwat ang Sandiganbayan og order de arresto batok kang kanhi presidente Arroyo sa kaso sa giingong pangurakot sa P366 milyunes nga intelligence fund sa Philippine Charity Sweepstakes Office.

Ang pangutana mao nga kon molusot na ang warrant of arrest, masikop ba dayon?

***

Di na kinahanglang sikupon si Napoles kay napriso na man siya sa kasong illegal detention case nga gipasaka sa principal pork barrel scam whistleblower nga si Benhur Luy.

Namahayag na si Senate President Franklin Drilon nga kon luwatan na sa Sandiganbayan ang order de arresto batok sa tulo ka mga senador, di siya mosugot nga adto dakpa sa Senado ang tulo. “As a matter of institutional courtesy, however, I will not allow the law enforcers to serve the warrant in the session hall or in the Senate,” matod pa ni drilon.