TINUOD man o dili, pero grabe ang alegasyon ni Sandra Cam, presidente sa whistleblowers’ association sa Pilipinas, bahin sa iyang gingong gihuptan nga sex video ni Justice Secretary Leila de Lima tali sa duha ka managlahing lalaki?

Katuhoan-dili apan dako kini kauwawan ni de Lima, buwag na sa bana, ug tinahod nga taas nga opisyal sa admi­nistrasyon ni Presidente Benigno Aquino III nga ehemplo sa katarong ug moralidad.

Kon tinuod ang de Lima sex video, makaingon ta nga dili lang diay mga artista ang nabiktima sama sa ulahing kontrobersyal nga sex video nila ni Katrina Halili ug Hayden Kho ug Chito Miranda ug Neri Naig.

Apan mapangahason ang pagbutyag ni Cam. Unsay nagpaluyo niini?

Si Cam nihulga nga iyang ipakaylap ang giingong sex video kon ang Commission on Appointment (CA) mokompirmar sa pagkatudlo ni de Lima isip kalihim sa Department of Justice (DOJ).

Gikataho nga ang CA magtigom og balik karong Miyerkules aron paghukom ni de Lima sa DOJ.

Ang Malacañang, sama sa ubang mga opisyal nga nalambigit sa kontrobersya, nanalipod ug sama sa walay interes sa pagpakisayod sa kamaturoan.

“Kung hindi natin makuha ang gusto, siguro huwag gawing venue ang CA para ituloy pa whatever ax it is you have to personally grind against Sec. De Lima,” pamahayag ni Deputy Presidential Spokesperson Abigail Valte sa media sa kaulohan.

Makapaduda usab ang reaksyon sa nailang isog nga si de Lima human kalma lang ug niingon nga dili angay tagdon si Cam?

Kon si de Lima nagtuo nga inosente ug tumotumo ang pasangil batok kaniya, kinahanglan modemanda siya og hustisya aron dili magduda ang katawhan sa iyang pagkatawo.