GIPANIGURO karon sa management nga wala nay masinating kainit sulod sa AT&T Center sa Game 2 sa NBA Finals karong buntag tali sa San Antonio Spurs ug sa Miami Heat.
Nahimo man gung dakong isyu ang kainit sa maong arena human maguba ang air condition sa Game One niadtong Biyernes nga gani mao usay gihimong rason kon nganong nabikogan si LeBron James hinungdan sa pagkapildi sa Miami Heat.
Mipasalig na usab si James nga 100 per cent kondisyon na siya karon ug andam na kining mokombati aron motabla sa series.
Pero nganong kining AT&T Center permi mang makasinati og mga paghasol ilabi na og mga krusyal nga mga duwa.
Matod pa ni Jason Terry, kanhi magduduwa sa Dallas Mavericks, nga nakahinumdom siya makausa nga dihay ilang mga duwa nga natingala sila nga napuno sa mga langaw ang locker room.
Unya karong tuiga, diha usay bitin sa nakit-an sa locker room sa visiting team. Sa niaging season sab kuno wa mo-function ang wireless access sa arena.
Way tihik-tihik nga mipabuhagay si Terry nga kon moduwa ka sa Spurs makapaabot gyud ka nga dunay mahitabong susama niini.
Buot niyang ipasabot nga paghasol-hasol sa mga visiting teams. Sa niagi sab kunong finals duna say mga langaw nga gani nagsunodsunod ni Udonis Haslem sa Heat. Morag nagduda si Terry nga dunay conspiracy.
Mao sab ni rason nganong si Jason Terry gibirahan sa mga media karon didto sa San Antonio. Bisan gusto lang sab siguro nga mahisgutan ni si Terry sa mga media kay mora man sab og nihinayhinay na og kawala na sa circle sa NBA ang iyang pangalan.
*******
Makapaabot ta nga mobahog og maayo ron si LeBron James karong buntag sa ilang Game 2.
Kini tungod kay nasentro na man gud ni siya sa pagsaway karon human siya mabikugi sa Game One nga hasta ang mga higanting Energy Drink nalakip usab sa kontrobersiya.
Dili bag-o ni James nga makasugat og ingon aning mga negatibong komento. Suma niadtong pagbalhin niya. Pero wa gyud ni siya matarog. Ug gani iya pang napamatuod nga sakto siya sa iyang gibuhat. Ganahan kaayo ni siyang i-challenge.
So expect him to wax hot this morning.
(junmigs0622@yahoo.com)