Talk to Papa Joe: Maorag namanyak

DEAR Papa Joe,

AKO si Gabriel, 19 years old, taga Cebu City. Naaghat ko og padala nimo niining akong sulat kay medyo nahasol na ko sa akong sitwasyon. Dihang gamay pa ko, na-molest na ko og usa ka bayot. Mga 9 years old pa ang akong edad ug bata pa kaayo og panghunahuna.

Kini nga bayot paryente ra ni namo nga gipapuyo sa akong mama sa amoa kay si Papa tua man sa Saudi niadtong panahuna. Lagi kay walay kauban, nitugot ra sab si Papa nga papuy-on. Buotan man siya kon naa sa atuba­ngan ni Mama pero kon motrabaho na si Mama ug kami na lang duha, motan-aw dayon na siya og mga x-rated nga salida. Bisan bata pa ko, isip lalaki, nakabantay ko nga mo-react ang akong pagkalalaki ug di nako ikalimod nga nakauyon ko niadtong giduwaduwaan ko sa bayot.

Pero ang akong suliran kay sukad sa mga panghitabo, grabe na man ko kagusto og sex bisan wala koy partner. Di man sab siguro ko manyak, apan grabe akong kahinam nga makita ko og babaye, labi na sexy, mabata o tiguwang, moduwa dayon akong hunahuna ug mangita ko og kaparausan.

Palihug unsa may buhaton nako kay nahadlok ko basin mograbe na hinuon ni ug makasala na hinuon ko og tawo.

GABRIEL

Gabriel,

Dong, kon ako pa nimo no, mangayo ka og tabang sa imong mga ginikanan, labi na sa imong papa. Basin maka­sabot siya kay laki siya, sultihi sila sa tinuod para matabangan ka ug ma-refer ka nila sa usa ka professional kay para nako psychological problem na nga nadala nimo sukad niadtong bata ka pa.

Mao toy nagpa-trigger sa imong sexual urge nga karon imong gikahadlukan, basin mao nay magtukmod nimo nga makabuhat og dili angay. Siguro, as in siguro lang naa kay desire sa tinuod nga pagbati sexually sa opposite sex nga partially natilawan nimo sa usa ka bayot.

Hayan ang home remedy nimo ana sa pagkakaron mao ang pag-ampo sa Ginuo kay ang pagpaduol niya makahatag kanimo og pagbaton og respetar sa isig kaingon labi na sa mga babaye. Time will come nga moabot ra na nimo ang saktong katagbawan. As much as possible kontrola og maayo. Daghang salamat.

PAPA JOE

(sa inyong tampo ipadala lang sa papajoelon@hotmail.ph)