PATAYNG lawas sa babayeng call center agent nga gipatay sa iyang kapuyo didto sa dakbayan sa Mandaue gidala na sa iyang inahan ngadto sa ilang lugar sa Mindanao.

Niadtong Sabado gidala na sa Oro­quieta City ang patayng lawas ni Ashela Antipuesto aron didto kini ihaya ug ilubong.

Niadtong Miyerkules sa miaging semana sa may Sector 6, Barangay Pagsabungan, si Antipuesto gipatay sa iyang kapuyo nga si Flint Toling tungod sa giingong selos.

Niadtong Biyernes sa udto niabot sa Sugbo ang inahan sa biktima nga si Eleuteria

Antipuesto, 63, gikan sa Oroquieta City, Misamis Occidental, niingon nga nakahibawo sila sa hitabo sa ila nalang nga mga paryente.

Dako ang pagmahay sa inahan ngadto sa suspek sanglit iyang gihulagway nga pinangga kini sa iyang anak.

Ang inahan di makatuo nga adunay relasyon ang iyang anak ug sa laing gipatay nga igsuon sa suspek.

Apan, iyang gibutyag nga daan na siyang way gusto sa gikatahapan tu­ngod kay siya mismo hapit mapatay niini sa dihang nisuway siyag badlong sa dihang nag-away ang iyang anak ug kapuyo kaniadto.

Gani, nagmahay siya sa iyang anak tungod kay bisan kanunay kining kulatahon sa suspek ug dihang iyang gipapili ang iyang anak sa lalaki ba o sa iyang pamilya gipili sa iyang anak ang suspek.

Si Eleuteria desidido nga mopasakag kaso batok sa suspek nga si Toling nga gipriso na karon sa Basak Police station.

Nasayran nga taod-taod nang nagpuyo ang duha apan wa silay anak. Nimabdos kini kaniadto apan gikatahong nakuhaan ang biktima.