USA ka maayong adlaw sa atong tanan ning adlaw nga Martes. Kadali lang sa mga adlaw, uy!
Balik kita sa atong panaghisgot sa mga mahinungdanong butang nga kitang tanan dunay kalambigitan.
Sama sa atong topiko nga gipapulsuhan ninyo, luwas ba ang mga Dabawenyo batok sa mga kriminal nga mosud sa dakbayan?
Sa kabahin sa kapulisan, giingon nga di basta-basta makasud ang mga kriminal sa Davao ug kung naa man, masakpan dayon sila sa ilang dautang plano gumikan daghang naka-montar nga closed-circuit television (CCTV) camera sa kadalanan ug sa mga establisemento.
Niadto pa, anaa ang pagsalig sa katawhan sa otoridad bunga sab kini sa gipasalig ni Davao City Mayor Rorido R. Duterte ngadto sa katawhan nga iyaha gyung proteksyonan.
Sa kinatibuk-an, maingon sa otoridad nga di dayon kita masudlan og dautang tawo diri sa dakbayan gumikan migamit na kita og modernong teknolohiya.
Mga higala, ania ang mga panlantaw sa atong mga nahinabing Dabawenyo:
Basta walay madamay
"Morag bantay naman lang sa kalinaw ning mga pulis. Buot ipasabot nga ayha pa sila mopatim-aw pagkahuman sa krimen. Ang delikado ani og madamay ang mga sibilyan kay yano naman lang mopatay ang mga kriminal kay dali raman nila ning mahimo. Basta, kung wala lay madamay, okay ra na sa ako." Rosendo B. Minales, Negusyante, Davao City
Mag-ampo
"Bisan pa og unsa na nga klase sa teknolohiya nang ilang ipamutang diha, di gihapon na magsilbi kung ulahi na ang tanan, kanang mahitabo na nga di nila mapugngan. Luwas man ta basta di lang gyud ta makiglambigit anang mga ilegal nga hinimoan." Joel L. Albino, Fruit vendor, Piapi Public Market, Davao City
Di safety
"Sa akong tan-aw, di ta safety kay ang akong amigo nga naglakaw sa dalan gilabnihan man gani sa isnatser, nasamad pa sa kutsilyo kay gition sa iyang kilid. Ang krimen nagsugod na siya sa kalisod mao nang ila na nga mabuhat." Engel Frank T. Giangan, Self-employed, Barangay 21-C Poblacion, Davao City