USA ka semana na ang milabay human gi-ambush patay si Laak Mayor Reynaldo Navarro, pero hangtod karon wala pa matombok kon kinsa gyud ang mastermind sa pagpatay kaniya.
Karon dako ang atong pagtuo nga way labot ang grupo sa New People’s Army (NPA) kay ila man kining gilimod ang pagpamanhig.
Matud pa sa kasaligang tinubdan, dili sad kasosyo sa iyang negusyo tungod kay layo ra sa tinuod subay sa pahayag sa molupyo sa lungsod sa Laak.
Duna koy suod kaayong amigo nga may gamay nga luna o yuta sa mong lungsod, ug nakadalikyat kining inyong magsusuwat sa pagkuyog kaniya niadtong adlaw nga Lunes, Hunyo 2. Ug dinhi nakahigayon kita sa pagpangutana sa mga yanong mga molupyo nga nagsulti nga dili tinuod ang mga pasangil nga nagnigusyo’g troso ang ilang mayor.
Matud sa mga residente sa maong lungsod, buotan daw nga Mayor si Rey Navarro maka-masa, ug dali ra kaayong duolon sa mga yanong longsuranon kon duna silay personal nga panginahanglan.
Maayo usab kunong makigrelasyon ang mayor sa mga kaaway sa gobyerno sama sa mga sakop sa NPA, kay bisan ug kaaway sila sa gobyerno basta dili kalang daw madaugdaugon sa mga masa, wala kay problema alang kanila, mao kanay batasan kuno ni Mayor Navarro.
Usa ka kanhi kagawad sa barangay nga atong nahinabi ug suhito sa dagan sa pamolitika ni Mayor Navarro nagsulti nga pinangga ang mayor sa mga katawhan sa Laak.
Siya usab ang nagsulti sa ato nga katapusang termino na sa mayor karong tuig 2016.
Politika ang anggulo sa paglikidar kang Mayor Rey Navarro. Ngano? Tungod kay matud pa sa atong impormante, matapus sa iyang termino pagka-mayor, modagan siya pagka-Congressman sa Segundo Distrito sa Compostela Valley Province, kay katapusan naman nga termino ni Congressman Amatong.
Sa dugang kasayuran nga atong nahipus, magkaalyado sila Mayor Navarro ug Congressman Amatong kinsa modagan pagka-gobernador sa probinsiya sa Compostela Valley, atbang daw ni Ramil Gentugaya.
Dili sanggabon sa natad sa politika si Mayor Navarro, nakatapus na kini og tulo ka termino sa pagka-Mayor, nahimong Vice Governor ug nahimong Board Member sa ikaduhang distrito. Mibalik sa pagka-Mayor ug wala na makatapus sa ika-unom ka termino kay gipapatay man siya. Kon kinsa ang nagpatay, hangtod karon padayon pa ang hinay pa sa bao nga imbestigasyon.
Matud pa sa mga molupiyo sa lungsod sa Laak, lisud pildihon si Rey Navarro sa bisan unsang posisyon sa politika nga iyang daganan. Tingali kadtong mga politiko nga way dag-anan sa natad sa politika maoy nagpalikidar para sigurado ang ilang kadaugan inig abot sa 2016 nga eleksiyon. Wa kitay mahimo kay hugaw ang politika sa atong nasud.
Alang sa dugang komento, pag-email sa algenoguin@yahoo.com o superbalitadavao@yahoo.com.