SI Davao City Mayor Rodrigo Duterte kagahapon nagsaway na sab ni Justice Secretary Leila De Lima sa iyang sayong pagpangampanya alang sa 2016 Presidential Election.

“Ikaw, de Lima, ayaw sigeg pangampanya, sayo pa kaayo. Kung ikaw na lang man ma- president aning Pilipinas, mobalhin na lang ko og America,” si Duterte nagsulti atol sa iyang programang Gikan sa Masa, Para sa Masa kagahapon.

Ang pahayag ni Duterte miguwa tungod kay pakyas si de Lima nga manalipod sa publiko batok sa mga dautang tawo.

Iya usab gisaway si Human Rights chair Etta Rosales.

“Ang human rights ang gina-protect nila ang mga criminal. Ang akong giprotektahan ang mga tawo sa Dabaw. Ikaw, Etta, undang na anang imong Pdaf,” sulti ni Duterte.

Ang mayor nagbahad sab sa mga kriminal nga mohunong na sa paghimo og dautang o mag-atubang sa kamatayon.

“Do not ever believe nga gisolo ninyo ang evil aning kalibutana. Daghan ta demonyo aning kalibutana,” suma ni Duterte.

Giapil ni Duterte ang Barrio Patay sa Barangay Leon Garcia, Agdao District ug NHA Mintal sa mga lugar nga gilubloban sa mga kriminal.

“Guwapo man ang Davao, sagana, barato ang pagkaon. Pero ayaw mo og binuang. Adto mo didto sa laing lugar. Ayaw mo diri. Basig likod sa Samal na mo makit-an. Palutawon gyud ta mo. Pag-ampo ra gyud mo nga naay makakita kay kung wala...nah,” bahad sa mayor. (Arianne Caryl N. Casas)