WALAY katarungan nga dili mosagop ang ubang mga baangay aning gipatuman nga curfew alang sa mga minor de edad.

Tataw man kaayo ang kaayohan nga gidulot sa maong programa ug nakatabang kini pagpahapsay sa kalinaw sa barangay.

Ang dakong hagit lamang niini mao ang kakuwang og mga barangay tanod nga mosuhid sa kadalanan.

Ug angay sab bantayan nato nga dili maabosohan kining curfew hour sa tigpatuman sa balaod.

Kay usahay gud, ug nahitabo na kini sa miaging katuigan nga hingpit gipatuman ang curfew, dunay tigpatuman sa balaod nga mismo maoy migamit sa curfew pagpatunhay sa ilang hiwi nga kalihukan.

Dako kini og bentaha alang niadtong mga ginikanan nga maglisod gyud pagpitol sa ilang laagan nga mga anak.

Apan dili sabton nga lingkawas na sa responsibilidad ang mga ginikanan niini.

Sa kinatibuk-an, makaayo gyud ang curfew kon kana ma-implementar sa sobsob nga paagi.

Panid-an nato kon unsay lintunganay aning curfew hour kay dili pud baya kalikayan nga sa matag programa dunay poy mga depekto.

Nagtuo hinuon ta nga dunay solusyion ang atong mga opisyal batok aning mga depekto.

Kon dili pud magtambayayong ang mga barangay pagpatuman aning curfew hour, maghatag lamang kana og kalibog.

Salikwaot man gud tan-awon kon ang kasikbit nga barangay dili magkahiusa sa programa.

Ngil-ad ang resulta kon samtang naglaroy-laroy ang ubang mga batan-on sa usa ka barangay, unya ang mga batan-on sa kasikbit nga barangay natanggong na sa ilang panimay pag-abot sa curfew hour.

Mas maayo ani nga i-unipormi ang curfew hour, buot sabton nga ipatuman unta sa tanang barangay.

Para nako, mahimong epektibo lamang kining programa sa curfew kon nasulbad nato ang gitumong sa maong balaod.

Niining curfew karon, tataw man nga gitumong niini ang pagsanta sa posibling kremin ug illegal nga kalihukan sa kabarangayan.

Ug kinahanglan niini ang kooperasiyon niadtong mga establisemento o patigayon nga dunay customer nga mga batan-on sama sa internet café, mga bar o uban pang balay kahilayan.

Nahibaw naman ta kon unsa kining mga establisemento nga abli bisan sa tungang gabii.

Pagkakaron, akong hangpon ug pasidunggan kining mga barangay nga nagpatuman sa curfew hour.

Dili angay mahadlok ang mga opisyal sa barangay kon dumtan sila sa mga botanti nga mga batan-an kay sa ulahi niining maayo programa moani ra gihapon sila og mabungahon nga resulta.