KRITIKAL usab ang kahimtang sa usa ka batang babaye human kini nadisgrasya ug nahulog sa gisakyang trisikad sa Aglayan, Malaybalay, siyudad sa Bukidnon, alas 3:45 sa hapon niadtong milabay’ng adlaw.
Ang biktima naila sa ngalan nga si Raihanna Sulaiman, 4, residente sa susamang dapit diin nahitabo ang maong aksidente.
Gisaysay sa inahan sa biktima nga si Aires nga samtang pauli na kini sila sakay sa usa ka trisikad kusog nga nagpadagan ang nagmaneho sa maong sikad ug naapikhan kini sila sa pagliko hinungdan sa pagkatumba niini.
Nakaangkon ang bata og samad sa ulo, pangos ug bun-og sa nagkadaiyang parte sa lawas niini human mahulog ug madat-ugi sa sikad.
Ang suspetsado nga driver sa naasoy nga trisikad naila sa ngalan nga Rey Redondo ug lumulupyo usab sa nasangpit nga lugar diin nahitabo ang maong aksidente.
Sa pagsulat ning balita kasamtangang giatiman pa kining biktima sa mga doktor sa Northern Mindanao Medical Center sulod sa emergency room ug gawasnon pa ang maong driver sa sikad.