DUHA ka mga giingong notadong karnaper ang nasikop sa atol sa operasyon nga gihimo sa kapolisan sa Tagoloan Police Station kagahapon sa kaadlawon sa Barangay Sihayon, lungsod sa Tagoloan, Misamis Oriental.

Giila ang mga suspetsado nga mao si Erwin Taca-Taca, alyas butsoy, 32, minyo, ug Mark Adane, 28, ulitawo, pulos residente sa susamang dapit.

Si Police Senior Inspector Maricris Mulat, kinsa hepe sa Tagoloan Police Station, niingon nga mikumpisal kanila si alyas Butsoy nga mokabat sa 60 na ka motorsiklo ang ilang nakarnap.

Moabot sa 40 ka motorsiklo ang ilang giingong nakawat sa area sa lungsod sa Tagoloan samtang moabot sa 20 ka motorsiklo ang nakuha sa kasikbit nga lungsod ug siyudad.

Gibutyag usab ni Butsoy nga daw aron dili mailhan nga ila kining gakawaton ila kining guyoron sakay sa motorsikad ug kung adunay mosita ipasumangil nga ipatul-id kay nadaot.

Gawas niini, daw giangkon usab sa suspek nga ila kining gibiyahe paingon didto sa probinsya sa Lanae del Norte ug ilang ibaligya bugti sa giingong ginadiling druga nga “shabu” ug kantidad nga P5 mil.

Aron usab daw dili mahibaloan nga kinawat ang maong motorsiklo, ila kining gapangbungkagon ug isulod sa karton hinungdan dili mailhan.

Daw dili gaulian ang mga suspetsado sa dapit apan dihang adunay nakasulti nga anaa ilang presensya deretsong gilusad ang operasyon gumikan sa sunod sunod nga reklamo batok sa mga suspetsado.

Ang kapolisan nihimo pa karon og dugang imbestigasyon aron marekober ang mga motorsiklo. Ang duha ka mga suspetsado gikatakdang mag-atubang og patong patong nga kaso ning panahona. (SVB)