MIHIMO na og lakang ang Cagayan de Oro City Police (Cocpo) sa sunod-sunod nga kaso sa pagpanglungkab sa nagkadaiyang mga subdibisyon ning siyudad sa Cagayan de Oro.
Kini ang gibutyag ni Cocpo Director Graciano Mijares human gibutyag niini nga nakaalarma ang sunod-sunod nga report nga adunay pagpangawat ug pagpanglungkab nga nahitabo sulod sa mga subdivision partikular diha sa Pueblo de Oro diin milangkob og napulo ka subdibisyon apil na ang Golden Glow Subdivision nga usa sa kanunay nga mabiktima.
Aduna usab report nga gilungkab usab ang laing subdibisyon sa Xavier Estates ug Grand Europa.
Matud ni Mijares nga usa sa lakang nga ilang gihimo mao ang pagmonitor ug pagpatawag sa mga security agency nga nadestino niini aron ilang masugyot nga kung mahimo madugangan ang ilang mga security guards nga mohimo og patrolya matag karon ug unya.
Dugang ni Mijares nga lisod ang ilang kapolisan makasulod sa subdibisyon hinungdan nga mohulat usab sila sa hangyo sa mga homeowners nga mangayo og police assistance.
Gawas niini bout usab ni Mijares nga dugangan ang police visibility sa dapit labina nga sakop kini sa Police Station 4 sa Carmen nga usa sa adunay pinakadako nga area nga gikober.
Susihon usab ni Mijares ang mga angulong nga mga insider lamang o mga kakunsabo tungod kay katingad-an nga recorded man ang bisan kinsa nga mosulod sa naasoyng mga high end nga subdibisyon.
Uwahing biktima niini niadtong Huwebes giingong nakuhaan og gamit nga mobalor og P250 mil sama sa laptop, ug uban nga mga gadgets.
Ang tag-iya, kinsa nidumili sa paghatag sa iyang identipikasyon, niingon nga natingala siya nga nakalock ang pirtahan apan ang likod sa panimalay abri.
Maoy ilang nasuta nga adunay mga gamit nga nawala. Dugang sa tag-iya nga aduna usab siyay mga silingan nga katulo na gibalik-balikan sa pagpangawat ug kanunay nga mawad-an.
Samtang si Mijares bukas sa sugyot nga i monitor gyod kanunay ang maong mga subdibisyon labina tahado ang mga kawatan kung adunay presensya sa kapolisan.
Gipasalig ni Mijares nga maaksyunan kini sa labing madaling panahon. (SVB)