GIPABUHAGAY nila ni Minnesota Timberwolves ug coach Flip Saunders sa Minneapolis-St. Paul radio station KFAN nga wala’y katungod si All-Star forward Kevin Love nga masagmuyo.

Gikataho nga dili interesado si Love nga mopirma og contract extension sa Timberwolves ug nagplano kining mosuway sa free agency alang sa sunod season sa National Basketball Association (NBA).

Gituohan nga tinguha ni Love nga mobalhin sa team nga adunay dakong poruhan nga mahimong kampiyon.

Gipasabot ni Saunders nga ang kanhi labing sinaligan sa Timberwolves nga si Kevin Garnett nakahukom nga mobalhin og team tungod kay kanunay lang pilde ang team niadtong higayuna. Nabalhin si Harnett sa Boston Celtics ug nakalangkat kini’g korona niadtong 2008.

“Just like I told Garnett, he didn’t have a right to be frustrated,” pasabot ni Saunders. “Why does any player have a right to be frustrated? You’re either part of the problem or part of the solution.” Sa unom niya ka mga tuig sa NBA, si Love kanunay naa sa playoffs tanan ubos sa kampo sa Timberwolves.

Tinuod nga importante si Love sa Timberwolves apan alang kang Saunders, wala bisan kinsa ang adunay katungod nga masagmuyo kon ngil-ad ang performance sa team.

Bisan sa gipakita ni Love, gitataw ni Saunders nga ang Timberwolves wala’y plano nga i-trade ang ilang labing pambatong magduduwa.

Lakip sa teams nga gusto untang balhinan ni Love mao ang Los Angeles Lakers, Houston Rockets, Chicago Bulls, Boston Celtics ug Golden State Warriors. (Reuters/ESL)