NAGPABUTO og 45 puntos si LeBron James aron agakon ang hosts Cleveland Cavaliers sa 105-101 nga kadaugan batok sa Indiana Pacers sa gikaintapan nilang deciding Game 7 sa ilang 1st round series sa National Basketball Association (NBA) Playoffs kagahapon.
Ang four-time MVP nakasinati og cramps sa iyang tiil apan giantos niini ang tanan ug padayon kining miduwa unya pinaagi sa suporta sa iyang mga kauban, ang Cavaliers nakaabante sa 2nd round diin naghuwat ang Eastern Conference no.1 Toronto Raptors.
Giangkon ni James nga grabe na kahago ang iyang lawas apan importante alang kaniya, nakaikyas siyang manamilit sa 1st round sa labing unang higayon.
“I’m burnt right now,” matod ni James. “I’m not thinking about Toronto right now until tomorrow. I’m ready to go home. Can we? I’m tired. I want to go home.”
Si James, kinsa mitali og 13-0 nga rekord sa 1st round series, nakadugang og siyam ka rebounds ug pito ka assists sulod sa 43 ka mga minutos nga pagduwa.
Sa gipakitang determinasyon ni James, giuwan siya og mga pagdayeg lakip na ang mismong gikan sa kampo sa Pacers.
“Amazing,” matod sa labing pambato sa Pacers nga si Victor Olapido kabahin sa duwa ni James.
“He did what he always does. It’s not really shocking. He’s the best in the world, and that’s what the best does and now I gotta work to get on that level.”
Sa sayo pa, si James misulti kang basketball agent Rich Paul nga naglingkod sa courtside nga dili siya mogawas.
Apan miduwa si James sa nag-unang 35 ka mga minutos unya siya misulod sa locker room sa nahabiling usa ka minuto sa 3rd quarter aron tambalan ang iyang cramps.
Sa iyang pagbalik, tataw sa pamay-ong ni James ang grabeng determinasyon nga andam moantos sa bisan unsang pagsuway. Wala na man sab gyud hinuon kapilian si James, kinahanglan niyang mokayod og maayo.
“It felt like a Game 7,” matod ni James. “It was like, your mind is thinking like, `OK, besides the two I played in the Finals, you start thinking like, is this it? Could this be it?’ That’s just human nature. And then the other side of my brain was like, `Let’s go make something happen. Let’s go, that’s what you here for. You’re here to make plays, you’re the leader.”
Rockets 110, Jazz 96
Nagpatakap og 41 puntos si James Harden aron pangulohan ang kadaugan sa No.1 overall ug hosts Houston Rockets batok sa Utah Jazz sa pagsugod sa ilang Western Conference semi-finals series o 2nd round sa playoffs.
Ang Rockets nakaposte og 25 puntos nga labaw sa halftime sa pagpangulo nila ni Harden ug Chris Paul, nga niadtong mga gutloa nakakumboya na og 34 puntos.
Si Paul niamot og 17 puntos alang sa Rockets.
Ang Jazz, nga ningpalagpot sa mas inilog nga Oklahoma City Thunder, 4-2, sa 1st round, nakitaan og kahago hinungdan nga wala kini nakasugakod sa kabangis sa sakto og pahuway ang Rockets.
Ang Jazz gipangulohan nila ni Jae Crowder ug rookie Donovan Mitchell pinaagi sa ilang 21 puntos matag usa. (AP, ESL)