MANGHINAUT ko nga mang­gawas ang mga Sugboanon gikan sa atong mga kabalayan ug sa mga malls aron atong ipakita ang atong kayugot tungod sa pagkawat og P10 bilyones gikan sa kaban sa nasud.

Gitakda karong Hunyo 12, 2014 ang usa ka rally ubos sa panawagan nga prisohon ang tanang mga sad-an niining dugay na nga nabunggo nga Napoles scam.

Sa pagkakaron, gikiha na ang nag-unang tulo ka mga senador nga nalambigit sa maong anomaliya nga sila si Senador Bong Revilla, Jinggoy Estrada, ug Juan Ponce Enrile.

Atong panawagan nga angay na silang moluwat sa ilang katungdanan. Nganong padayon pa man nilang paka­uwawan ang Senado? Tuyo ba nilang gamiton ang Senado isip paagi nga manglabay og lapok batok sa mga opisyal nga nag-imbestigar sa ilang mga kahiwi-an?

Tan-awa gud kadtong con­firmation hearing ni Sec. Leila de Lima. Motugot ba kita nga usa ka gipasanginlang kawatan diin daghan ang nakuhang ebidensiya nga si Senador Jinggoy Estrada, ang giingong “sexy” sa mga files ni BenHur Luy, igo lang manglabay og lapok sa iyang desperadong mga lakang nga malibre?

Atong ipakita karong Hunyo 12 nga wala kita makauyon sa ilang gibuhat ug atong isinggit nga angay na silang moluwat sa katungdanan.

Nagtuo kita nga daghan pa sa atong mga opisyal ang nalambigit niining maong anomaliya.

Ug atong ipadayag nga di lang unta kutob niining tulo ang imbestigasyon ug ang ikiha. Iapil na bisan mga sakop sa administrasyon nga nalambigit.

Apan dili kita magpadala niining argumentong bulok nga di angayang ikiha silang tulo kay duna pay daghan sad-an. Ngano kuno nga sila gi-single out? Kay kuno sila oposisyon?

Pagka hinanggaw nga argumento. Mawala ba diay ang ilang sala kon sad-an sab ang uban?

Angayan ba gyung dunganon ang tanan pagkiha? Kon mas daghan diay ang ebidensiya batok sa tulo, di lang gyud ikiha kay apilon gyud ang tanan?

Samtang nalipay kita niining pagkiha sa tulo, angayan atong isinggit ang punto nga angayang isunod pagkiha ang uban pang nalambigit.

Tinuod init ang adlaw karon. Buot ipasabot, dakong sakripisyo ang pagbuwad sa init karong Hunyo 12. Apan gikinahanglan kini aron mapadayag nato ang atong gibati nga kasuko tungod sa ilang pagkawat sa pundo sa nasud.

PORK

Kining pagkawat sa pundo nga atong gitawag nga pork barrel usa sa mga argument nganong ato gyud nga tangtangon ang gitawag nga pork barrel system.

Mao kini ang paghatag og gidagkong pundo aron maoy ipundo sa giingong mga proyekto sa mga politiko. Apil na niini ang gitawag nga legislative pork ug ang presidential pork.

Ang legislative pork mao ang pundo nga gawas nga kawatunon (kuhaan ba og SOP nga 10 porsiyento para bulsa ug hutdon na ba lang), gigamit sab alang sa mga proyekto nga panghambog sa mga magbabalaod nga ila kintahay nga performance.

Matud pa, mao kini ang pundo nga “in aid of reelection.”

Ang presidential pork sama sa DAP ug kining sa Pagcor fund, mao sab ang pundo nga magamit sa Malakanyang alang sa mahaylo ang mga magbabalaod aron iyang makuha ang iyang kagustuhan.

Ngil-ad ang maong pundo mao nga gilusad nato kining kalihokan alang sa pagwagtang sa pork barrel. Ug usa sa lakang nga atong buhaton mao kining pagtambong sa atong anti-pork rally karong Hunyo 12.

(Sunda @anol_cebu sa Twitter)