KANTA. Si Cebu City Mayor Mike Rama di maguol og mawala siya sa pulitika tungod kay duna siyay trabaho nga gawas happy siya makalingaw pa gyud. Maayo na kaayo mokanta ug mo-entertain si Mayor Mike.

Niadtong Biyernes, Hun­yo 6, usa si Mayor Rama sa among dinapit nga bisita atol sa paghurar sa ika-43 nga opisyales sa Rotary Club of Cebu South (RCCS) didto sa Casino Español de Cebu.

Imbis nga siya ang among abi-abihon, si Mayor Rama na hinuon maoy naglingaw namo pinaagi sa iyang kanta ug balak. Ang wa pa masuhito ni Mayor Rama di makatuo nga mo-entertain diay ang mayor sa dakbayan sa Sugbo.

Tungod kay naa pa siyay lain atimanon nga kalihokan nga imbitado usab siya, wa na mohuwat si Mayor Rama sa among programa.

Ang bag-o nga opisyales sa RCCS sa tuig 2014-2015 mao si Danilo G. Singco, presidente; Atty. Dante S. Arriesgado, bise presidente; Helbert P. Espinosa, sekretaryo; Geopeter Mayhew, tesorero; Felix Ruiz, auditor; Climaco V. Villanueva, Jr., director membership; Kenneth Mark Migriño, director service project; Antonio Sabuga, director international service; kining inyong maglilindog, director public relations; Celso G. Laniba, director club administration; ug Teodoro Arnaiz, director new generation.

Si Lirio Sandoval, past district governor sa Rotary District 3800, nga taga Marikina, maoy nagpahurar sa mga bag-o nga opisyales sa RCCS.

Ngan nga usa ka bag-o nga miyembro sa Rotary, akong nakita nga usa ka solemniya ang seremonya sa pagpahurar sa mga opisyales sa RCCS sa Rotary Year 2014-2015. Ang pagtugyan sa katungdanan gihatagan og dakong bili aron tinud-anay ang serbisyo sa katilingban.

****

KIHA. Nakiha na gyud sila si Sen. Juan Ponce Enrile, Ramon “Bong” Revilla, ug Jinggoy Estrada sa kaso nga plunder ug pangurakot niadtong Biyernes, Hunyo 6, didto sa Sandiganbayan.

Nahilambigit sila si Senadores Enrile, Revilla, ug Estrada sa P10 bilyunes nga pagpanonto sa Priority Development Assistance Fund (PDAF) nga si Janet Lim Napoles maoy gidudahan nga utok sa scam.

Apil sa kiha sila si Atty. Gigi Reyes, chief of staff kaniadto ni Enrle; Richard Cambe, chief of staff ni Revilla; ug si Pauline Labayen, staff ni Estrada.

Natural apil sa kiha si Napoles, ngan nga mastermind sa PDAF scam. Si John Raymond de Asis, ang nagdala sa Kaupdanan para sa Mangunguma Foundation, Inc., ug si Ronald John Lim sa Ginintuang Alay sa Magsasaka Foundation, Inc., gikiha usab.

Matod pa sa taho si Revilla nakakawat og P242 milyunes, si Estrada P182 milyunes ug si Enrile P172 milyunes.

Apan bisan pa niini pagpasaka sa sumbong plunder ug pangurakot batok aning tulo ka

senadores, naa gihapoy daghan kurakot sa mga ahensya sa atong kagamhanan labina sa mga poderoso nga departamento.

Gani, daghan sa atong ka­ig­soonan nga nagduda nga kutob ra sa pagpasaka sa sumbong ug dili makumbikto kining mga gikiha tungod kay igkahuman sa termino ni Presidente Aquino daghan ang mobalimbing labina og dili kauban sa partido ang ma- presidente unya.

Pagka dako sa kantidad nga nausik samtang pipila lang katawo ang nagpahimus sa P10 bilyunes. Ang atong mga estudyante sa elementarya wa unta karon magproblema sa eskuylahan.

Hinuon daghan ang nanghinaut nga kining kaso nga gipasaka sa tulo ka senadores maghatag ehemplo sa mga empleyado sa kagamhanan nga ang mangawat o mangurakot dunay

kinutuban.

(atty.ellieE@gmail.com)