DILI lang kay sa Kapitolyo nakahimo og kasikas kining kontrobersiyal nga Black Pearl Security Agency kon dili hasta usab diay sa dakbayan sa Talisay.
Sa niaging semana, ang Commission on Audit (COA) na mismo maoy nakadiskobre nga kining maong Security Agency mao sab ang gikuha sa Talisay City nga mopuli sa Lancer Security Agency sugod niadtong Agusto 2013 hangtod sa Disyembre nga wa moagi og bidding.
Pero ambot kon unsa kini ka tinuod nga mi-take over kining maong Black Pearl Security Agency nga wala pay kontrata ug atol sa pagkuha sa serbisyo niini, wa pa gyud kini
license to operate.
Sa dokumento nga nahuptan sa COA, nasuta nga niadto pang Nobiyembre 25, 2013 nakakuhag license to operate ang maong agency apan gikuha ang ilang serbisyo sa Talisay nianang bulan pa sa Agusto – sa ato pa tulo ka buwan nga illegal silang nag-operate sa Talisay.
Nakapadugang sa komplikasyon mao nga wa usab diay kini moagi sa konseho aron mabuhatan og resolusyon nga magtugot sa mayor nga maoy makigpinirmahay sa kontrata, in behalf sa City Government, ug sa midaog nga bidder.
Laing nasuta sa COA mao nga ang 91 ka mga guwardiya gihimo na hinuong job order employees sa Talisay ug ang mokobra sa ilang suweldo nga P430 matag adlaw ang taga Black Pearl. Kini maoy dakong supak sa balaod.
Sa dugang imbestigasyon, nasayran usab sa COA nga tag P300 ra diay ang gisuweldo sa mga guwardiya kinsa sa samang higayon job order employees usab sa Talisay.
Sa Kapitolyo maayo na lang kay mora og napakgang man, pero kining sa Talisay taodtaod nang nakagasto ang gobiyerno.