Gibasura sa korte ang giduso nga mosyon sa giilang lider sa kulto sa lungsod sa Balamban aron pagsuta kung duna ba gyuy kapasikaran ang pagpasaka ug kasong serious illegal detention batok kaniya.
Ang giilang Diyos Amahan nga si Casiano Apduhan, Jr., nag-atubang sa kaso tungod sa giingong pagtanggong niini kang Emma Nepuceno, sud sa lima ka tuig.
Niduso siya og motion to determine probable cause ug tinguha niining mabasura ang kaso batok niya human gipanghimakak sa biktima nga gitanggong ni Apduhan.
Sa kamanduan ni Judge Hermes Montero sa Toledo City RTC Branch 59, gitumbok niini nga di siya mahimong mohukom pagbasura sa kaso tungod kay wala paman sab mapaubos sa arraignment ang akusado.
Dugang sa huwes, di sab mahimong ibasura ang kaso tungod sa paghimakak sa biktima nga gitanggong siya.
Ang Provincial Women’s Commission, pinaagi sa co-chair niini nga si Bise Gob. Agnes Magpale, nalipay sa maong kalambuan human nagtuo sila nga nihuyang ang ilang kaso.