TRAYSIKAD driver nakaangkog dul-an sa 40 ka mga samad dinunggaban sa nagkadaiyang parte sa kalawasan dihang giluba sa mag-uuma, kinsang kapuyo iyang gikadulog niadtong Dominggo sa alas 11:20 sa gabii sa Juan Luna street, Barangay Looc, dakbayan sa Danao.
Si Freddie Galo, 47, trisikad driver, dunay kapuyo, nabulit sa samad dinunggaban sa kalawasan human giduslak og screw driver sa suspek nga si Jerry Perer, 46, mag-uuma, taga Barangay Masaba, dakbayan sa Danao.
Si SPO1 Aresteo Espina, desk officer sa Danao Police nga nahinabi sa Sun.Star Superbalita, nagkanayon nga nasakpan sa akto ni Pere nga ang iyang kapuyo niya nga si Elvira Luna, street sweeper sa Danao city, nagdulog ug ang biktima.
Tungod niini, si Perer niataki kang Galo, iyang gidunggab sa makadaghang mga higayon nga hinungdan sa iyang kamatayon.
Si Perer nga nahinabi sa Sun.Star Superbalita niangkon sa krimen nga iyahang nahimo tungod sa pagluib sa iyang kapuyo, diin siya ug ilang duha ka gagmay nga bata gibaylo sa trisikad driver.
Matod niya nga panagsa na lang mopa-uli ang iyang kapuyo.
Katapusang nipauli sa bukid niadtong Sabado, apan wa mopakita kay didto lang sa balay
sa mga ginikanan niini.
Tungod kay wa na siya makaagwanta sa gihimo niini, nakahukom siya nga moadto sa dakbayan sa Mandaue aron mangitag trabaho kay naa usab ang iyang ginikanan.
Ang iyang anak nga mga lalaki nga nagpanuigon og 9 ug 7 anyos iyang gikuyog niadtong Dominggo sa gabii paingon sa Barangay Looc, dakbayan sa Danao aron ihatud kang Elvira.
“Ang akoa lang ta tuyo didto ihatud sila mga bata kay malooy ko sa akong mga anak samtang mobiya ko manarbaho, pero mopadala kog kwarta nila kay nadawat na man nako nga nagbinuang siya,” dugang ni Perer.
Apan wa na siya makapugong dihang pag-abot nila sa gipuy-an sa iyang kapuyo, maoy nakita niya ug sa duha niya ka gagmayng bata ang ilang inahan nga nagdulog sa biktima.
Ang biktima gikatahong nag-brief na lang niadtong higayuna samtang ang asawa nag-short nga nahinanok sa ilang pagkatulog.
Ang iyang mga anak nipadayag sa kalagot sa ilang inahan kay misulti nga way kapuyo apan gibiyaan sila sa bukid kay diay dunay laing lalaki.
Gumikan niini, iyang gimandoan niya ang iyang mga anak nga mopadaplin kay iyang atakihon ang kapuyo ug ang biktima.
Gihinayhinay niyag lugit ang lock sa pultahan ug dihang naabli, nihasmag siya.
“Ako gilayong gi-ataki gidungab sa dughan gamit ang screw driver. Nakabangon siya, nisukol, nasumbagan ko maong nagisi akong walang kilay’ pero nalipong kay natusaktusak sa pagdunggab,” matod ni Perer.
Gipatiran niya ang biktima ug nakadagan pa paingon sa gawas, samtang si Elvira misinggit pagpangayog tabang dayon kalit nga nahanaw.
Iyang gigukod si Galo ug Giusban niya sa pagduslak sa makadaghang higayon sa walang dughan ug buko-buko hangtud nga namatay samtang nagsub-ong ang duha ka mga anak pipila ka metros gikan kanila.