GAWAS sa buhis, ang kamatayon maoy seguradong moabot sa kinabuhi sa tawo. Tungod sa sensiya ug teknolohiya nalugwayan pa kinabuhi sa tawo.
Apan tungod pod sa sensiya ug teknolohiya, daghan ang mamatay sama sa paggamit og kemikal sa pagkaon, polusyon, giyera, wa pay labot niini ang estilo sa kinabuhi.
Ang US maoy nag-unang nasud sa kalibutan nga daghan og tambok o "obese" - kadtong mga tawo nga mora'g laton ang hawak. Tungod kay nagsunod ta sa uso sa puti, daghan sab nga Pinoy ang taba.
Ang Koreano ug Insik yata ang may pinakagamay nga hawak kay puro pansit ang kinaon.
Ang cardiovascular diseases (CVD) ang nag-unang hinungdan sa kamatayon apil dinhi ang alta-presyon, diabetes, heart attack ug uban pa.
Tungod kay dili malikayan, nangandam na daan ang kadaghanan sa taliabot nga kamatayon.
Apan unsa kaha kung bisan ang pagpangandam sa kamatayon ihikaw sa kagamhanan?
Didto sa Anqing City sa eastern province sa Anhui, China, unom ka tiguwang ang nagpakamatay una nagsugod ang bag-ong regulasyon nga di na tugtan ang paglubong sa lungon.
Kinaiya sa Insik nga ilubong ang patay sulod sa lungon ug kung kuwartahan, patukoran pa'g musoliyo.
Apan tungod sa kakulang na sa yuta nga matamnan og pagkaon, nakahukom ang ilang gobyerno nga payhagon ang mga nitso ug sementeryo sa tibuok nasud.
Naghimo pa sila'g kampanya sa "cremation" o pagsunog sa patay inay nga isulod sa lungon.
Busa ang lokal nga gobyerno sa Anqing naghimo'g regulasyon nga ang tanang mamatay human sa Hunyo 1, 2014 i-cremate na.
Ang katawhan sa Anqing dugay nang nangandam og mga lungon ug duha ka bulan lang sila nakahibalo sa bag-ong regulasyon.
Nagsugod na'g kumpiska ang ilang opisyales og mga lungon nga giandam sa pamilya nga gikasubo nila.
Aron malubong pa sa lungon, nagpakamatay ang unom ka tigulang sa wala pa ang maong petsa.
Si Wu Zhengde, 91 anyos, naghikog niadtong Mayo 5 human niya nasayran ang maong regulasyon.
Laing babaye nga si Zheng Shifang, 83, nagpakamatay usab human gigabas ang iyang lungon sa iyang atubangan.
Ang uban niambak sa atabay samtang ang uban niinom og hilo aron magamit pa ang ilang tinipigang lungon sa paglubong sa wa pa ang Hunyo 1.
Tungod sa pagbuto niini sa media, dali-daling nitubag ang gobyerno sa China nga ang pagpakamatay dili konektado sa bag-ong regulasyon. Daghan daw'ng tigulang sa China busa daghan sab ang magsakit ug mamatay.
Dili daw sakto nga kumpiskahon sa gobyerno ang lungon kay pribado kining butang sa pamilya.
Niadtong 2012, gidemolis na ang 400,000 ka lubnganan sa Henan Province ubos sa malangkubon nga kampanyang "flatten graves" aron magamit sa agrikultura.
Unsa kaha kung moabot kining maong regulasyon sa Pilipinas? Ang paghipos sa patay mahimong dakong problema sa gobyerno sa mosunod nga henerasyon.
Hinuon, hinay-hinay na nga gidawat nato ang cremation isip praktikal nga paagi sa paghipos sa patay. Apan seguradong daghan pa'g gusto sa karaan sama sa usa ka Insik nga si Shi: "Lisud ang akong naagiang kinabuhi busa gusto nako nga matulog nga di mabasa sa ulan sulod sa akong lungon."