GIPAKUSGAN karon sa Barangay Council sa Buhangin Proper ang Buhangin Falcons Rugby Club nga gilangkuban sa mga kabataan nga kaniadto nalambigit sa gang.

Mga bata ilang giorganisa aron mabalhin ang ilang atensyon sa sports imbes sa riot sa ilang barangay.

Si Barangay Buhangin kapitan James Salvador nagsulti sa Sun.Star Davao Superbalita nga ila kining gihimo aron masulbad ang suliran sa gang sa ilang barangay.

Buhangin Falcons Rugby Club members
DAVAO. Si Barangay Buhangin Proper kapitan James Salvador (tunga) miposing sa mga sakop ug coaches sa Buhangin Falcons Rugby Club nga mipakita sa ilang kalampusan sa mga gisalmotan nga kompetisyon. (Seth delos Reyes)

Giingon nga pipila sa mga sakop sa team nalambigit sa pagsimhot og solvent nga rugby kung malipong na sila, manghagit og riot.

"Sa una, nagagamit gyud ko og solvent, unya kung mabikil mamigay dayon," sulti ni Jerry Edaño, 18, nagpuyo sa Purok Pine Tree, Barangay Buhangin.

"Sige lang ko makaundang pag-eskwela kay daghan man ko og kaaway sa eskwelahan," dugang ni Edaño, kinsa grade 9 student karon sa Bernardo Carpio National High School.

Gisulti ni Edaño nga dihang nakasulod na siya sa team, hinay-hinay nga nausab ang dagan sa iyang kinabuhi.

"Karon, kalmado na kaayo ko. Dili pareha sa una nga gamay lang kantiyaw, away dayon. Ug ganahan na sab ko mo-eskwela," malipayong pahibalo ni Edaño.

"Gani, pinalangga nako sa akong teacher. Kung mo-abset gani ko, pangitaon ko sa akong maestra."

Sa ngalan sa iyang team, mapasalamaton sila sa ilang coaches nga sila Yodz Bingtan ug Butch Coleto.

"Ila gyud ming gitudloan sa maayong disiplina sa sarili," sulti ni Edaño.

Gawas sa ilang mga coaches, nagpasalamat sab sila kang Kapitan Salvador nga maoy naningkamot nga maorganisa ang football team.

"Mao ni giingon nga gikan sa Rugby Boys paingon sa Rugby Football Club," sulti ni Salvador.

Ang kapitan nagsulti nga sukad nagbalhin ang atensiyon sa mga bata sa sports, wala nay riot nga nahitabo sa barangay.

"Nagsugod ni sila last March this year. Ug kadaghan na sila nag-champion sa mga competitions," pahibalo ni Salvador.

Sanglit na-organisa na ang maong team, gisulti ni Salvador nga ilang libuton ang tanang eskwelahan sakop sa Barangay Buhangin aron organisahon ang mga bata nga hilig sa Rugby Football.

"Amo nang sulatan ang mga schools para mas mokusog ug ma-promote ang Rugby Football sa mga bata," sulti sa kapitan.

Tanang panginahanglan sa mga bata giabaga karon sa barangay sanglit wa pa sila nakakuha og budget sa City Sports and Development Office ilawom sa City Mayor's Office.

Dili hinuon tanang sakop sa team naggamit og solvent nga rugby sanglit dunay nagpsakop nila nga daan nang hilig sa sports.

Ang team gilangkuban sa 16 ka miyembro, lakip na ang duha ka babaye, ug pinakabata kanila nagpangedaron og 8-anyos.