MAGUINDANAO -- Baynte ka pamilya ang namakwit human manulong ang mga sakop sa Bangsamoro Islamic Freedom Fighters (BIFF) sa kampo sa mga sundalo alas 8:20 sa gabii niadtong Dominggo.

Gibutyag ni Philippine Army 6th Infantry (Kampilan) Division spokesman Colonel Dickson Hermoso nga gisulong sa BIFF ang detachment sa 61st Recon Company sa Barangay Ganta, Shariff Saidona, Mustapha.

Apan abtik nga nakabantay ang mga sundalo hinungdan nga dali silang nakabawos og pabuto batok sa mga rebelde nga milungtad og 35 minutos.

Miatras ang mga rebelde sa diha nga sila gibombahan sa mga sundalo gamit ang 105mm Howitzers Cannon.

Usa ka sundalo ang naangol apan luwas na sa diha nga gidala dayon siya sa Camp Siongco Hospital sa 6th ID.

Giangkon sab ni Bangsamoro Islamic Freedom Movement spokesman Abu Misry Mama nga tulo sa ilang mga sakop ang naangol sa ilang pag-atake sa kampo sa militar.

Target unta sa BIFF nga kuhaon ang ilang kampo nga nailog sa militar sa mga nakalabay nilang engkuwentro didto sa probinsiya sa Maguindanao. (Edgar Fuerzas)