Nagpatay sa negusyante gidemanda na sa korte

GIPRESENTA na sa korte kagahapon ang mag-uyab nga suspek sa pagpatay sa negusyante niadtong Hunyo 6, 2014.

Mga suspek mao sila Daisy Joy Cachapero, 27, ug Ariel John Jamora Liawan, 25, kinsa nasikop sa ilang gipuy-an sa Sulop, Davao del Sur.

Human gitun-an ang mga ebidensiya sama sa footage sa closed-circuit television camera didto sa Apo View, sila gitudlong maoy nag-unang suspek sa kamatayon ni Ramon Teodoro Garcia, 67.

Si Cachapero gidala sa mga personahe sa Davao City Police Office (DCPO) samtang si Liawan gidala sa mobile patrol sa Talomo Police Station padung sa korte aron pasakaan og kaso.

Giingon ni DCPO Director Vicente D. Danao Jr. nga kasong abduction ug robbery with homicide ang giatubang nga kaso sa mga suspek.

"Kakasohan silang dalawa ng abduction at robbery with homicide," sulti ni Danao, kinsa midugang nga, "natapos na rin natin ang inventory sa mga gamit ng biktima na nakuha sa bahay ng babae doon sa Sulop."

Kahinumdoman, nakaplagan ang patay nga lawas sa biktima nga gibaatan ang baba og packaging tape ug dunay daghang samad dinunggaban sa lawas.

Nakita ang biktima pinaagi sa usa ka mag-uuma niadtong Sabado sa buntag didto sa Sitio Baluyan, Barangay Bolton, Malalag, Davao del Sur. (Jeepy P. Compio)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph