ANGAY natong suportahan ang dakong kalihokan sa Simbahang Romano Katoliko sa tibuok kalibotan nga ipahigayon sa dakbayan sa Sugbo karong Enero 24 ngadto sa 31 sa 2016, ang International Eucharistic Congress (IEC), nga gibanabana nga dili mominos 15 mil ang partisipante gikan sa naglainlaing nasod ug labaw sa tanan, gilauman nga si Pope Francis motambong sa IEC 2016.

Dakong garbo sa Sugbo nga mohangop sa laing makasaysayanong kalihokan sa simbahan, human sa iyang importanteng papel sa pagpakaylap sa Kristiyanismo sa Pilipinas sukad niadtong tuig 1521 ug giilang hangtod karon nga bugtong Kristiyano nga nasod sa Asya.

Nahimong galingan ug tinubdan sa daghang mis­yonero ug martir sa simbahan sama sa unang Pinoy nga nahimong santo nga si San Lorenzo Ruiz ug Bisaya nga si San Pedro Calungsod ug uban pa nga wala masubay sa talaan sa kasaysayan.

Mao kini naghimo nga ang Sugbo bahandianon sa iyang kabilin ug kultura human dinhi unang niabot ang imahen sa Batang Hesus, mahal nato nga si Sr. Santo Niño nga timaan sa Kristiyanismo.

Atong dasigon ang lokal nga kagamhanan nga mohatag sa hingpit nga suporta sama sa gihangyo ni IEC secretary general Msgr. Dennis Villarojo sa konseho sa Sugbo sa miaging adlaw: (1) transportas­yon sa mga delegado, (2) pagdeklarar sa Enero 29 sa maong tuig nga non-working holiday aron luag dalan alang sa prosisyon ug (3) pag-abag sa higpit nga seguridad sa tibuok kalihokan sa IEC.

Sa pikas bahin, gawas nga maila sa kalibotan, ang IEC motabang sa pagpatuyok sa lokal nga ekonomiya tungod sa daghang bisita o turista.