NIINI pa lang ka sayo, nagpanikad na si boxing superstar Manny Pacquiao sa bag-o niyang tahas nga pagasagubangon isip headcoach sa Kia Motors, usa sa tulo ka expantions teams sa Philippine Basketball Association (PBA).

Nagkanayon si Pacquiao nga plano niyang gamiton ang iyang nakat-unan sa boksing ngadto sa basketball.

“Malaki ‘yung madadala ko from boxing kasi yung basketball, more on strategy at maraming different style,” asoy ni Pacquiao sa interbyu sa www.abs-cbnnews.com.

Gipahimangnuan ni Pacquiao ang mga magduduwa nga molangkob unya sa team nga mangandam alang sa grabe ka lisod nga training.

“’Yung experience ko as boxer, madadala din sa training, kaya ‘yung mga players, maghanda na sila,” dugang ni Pacquiao, kinsa maoy labing unang aktibong boksidor nga nahimong coach og professional basketball team.

Ang boxing 8-time world champion plano untang kuhaon sa KIA isip playing coach apan wala kini tugti nga makaderekta og duwa alang sa team ug kinahanglan pa kining miagi sa rookie draft basi sa patakaran.