PUWERTING bun-oga karon ni Atty. Orvi Ortega, chief of staff ni Cebu Governor Junjun Davide, ug chairman sa Provincial Bids and Awards Committe (PBAC), sa mga ataki sa media mahitu­ngod sa anoma­liya nga nalambigitan niini.

Dunay pasangil nga nakakuwarta si Ortega og tag-usa ka libo ka pesos sa matag usa ka guwardiya aron paboran sa bidding ang Black Pearl Security Agency nga mobantay sa Kapitolyo.

Laing istorya sa Kapitolyo nga akong nakuha nga si Ortega dunay negosyo nga mokita og dul-an sa P200 mil ang matag buwan?

Samtang, nabaniog usab sud sa Kapitolyo ang nakarelasyon kini sa laing sinalingan sa buhatan ni Davide. Ambot unsa kini ka tinuod? Apan base sa mga nagtumaw nga istorya, makaingon kita nga ang tuong kamot ni Davide sama sa nalambigit sa panguwarta ug pamabaye?

Sus, kon buot lang nako utingkayon, daghan pa ko og masulti sa mga tawong tigpakaaron-ingnon nga naa diha sa Kapitolyo.

Mao ba kini ang ilang adbokasiya nga ‘tuwid na daan’? Morag ang pagpalami man sa hugot ug dangog nga daan ang gihimo karon diha sa mga dagko sa Kapitolyo?

TUNGOD SA DRUGAS

Gisulti na kini kanako kaniadto pa na ang mahitabong patay tungod sa kampanya ug negosyo batok sa illegal nga drugas. Sa wala pa mapatay si Chief Inspector George Caña, hepe sa kapulisan sa lungsod sa Ubay, Bohol.

Kon tinuod nga ang pag-ambush ug pagpatay ni Caña, gumikan sa hugot nga kampanya batok sa illegal nga drugas, wa diay hepe sa pulis dinhi sa Sugbo ang seryusong mikampanya kay wa man patya sa drug lord?

Way kahadlok ug kaluoy ang mga suspek kay ilang giagtang, ginawong ug sa ulo pagpusil ang pulis. Nakabawos ang Bohol Provincial Police Office kay ilang napatay ang drug lord nga kanhi pulis nga si Rosales, ug ang lima ka mga kauban atol sa manhunt operation sa hideout niini didto sa lungsod sa Bien Unido Bohol.

Kon wa ko masayop duha na ka mga hepe sa kapulisan sa Bohol ang napatay sa sindikato sa drugas.

NASUKO NA SI LABELLA

Sa akong pagsabot, wa ikalipay ug gikasuko ni Bise Mayor Edgar Labella, chairman sa Police Coordinating Advisory Council (PCAC), ang taho nga dunay mga pulis sa siyudad sa Sugbo nalambigit sa kalihukan sa pagbaligya ug illegal nga drugas.

Para nako angayan masuko si Labella, kay way pulis ug hepe sa kapulisan ang napatay sa sindikato sa drugas. Kay kon duna man, nagpasabot kana nga ang kapulisan sa siyudad way gidawat gikan sa drug lord.

Nabalaka ko nga tingaleg dili lang 20 ka mga pulis ang protector kun dili mayoriya kanila ang nakapusta sa sindikato. Didto sa Bohol, duha na ka mga hepe sa kapulisan ang gipatay kay seryuso man sa kampanya sa drugas.

Maayo tingali og ibaylo nato, Sir Labella, ang mga pulis sa Sugbo, ilabay sa Bohol.

Ang delikado makat-on na hinuon og panguwarta ang mga Bol-anong pulis sa mga gagoy nga Sugboanon nga madistino didto.

(efren_lonzon@yahoo.com, 09156938444 / 09327380888)