ANG black pearl mao ang talagsaon nga matang sa perlas ug mas mahal kay sa ordinaryo nga perlas. Sa salida nga Pirates of the Carribean, may itom nga barko nga gitawag ug Black Pearl.

Apan dili ta maghisgot dinhi og perlas ug barko, ang Black Pearl nga atong hisgotan mao ang security agency nga nag-operate karon sa Kapitolyo.

Nagsugod ug kaukay ang Black Pearl human nagsugod na ug operate ang mao nga security agency sa Kapitolyo bisan wala pay kontrata. Kini dakong kwestionabli.

Angayan nga susihon sa sensiro nga paagi kung tinuod ba nga adunay kapasidad ang contractor nga Black Pearl. Ang kapasidad sa contractor nga security agency mahinungdanon nga rikisito subay sa Labor Code of the Philippines.

Ang kapasidad maglangkob kini sa puhonan nga sarang makatubag sa serbisyo ug benepisyo sa mga gwardya, saktong opisina, saktong mga ekipo ug uban pa.

Si Atty. Orvi Ortega, ang legal officer sa Kapitolyo akong nahinabi atol sa akong programa Straight to the Point sa dyHP, niingon nga ilang gihimo ang saktong proseso sa pagkuha sa serbisyo sa Black Pearl. Atol sa bidding, nagtabla ang tulo ka mga security agency nga lakip niini ang nasuwayan na nga Tactical Security Agency.

Ang hinungdan ra gyud nga daw gipaboran ang Black Pearl tungod kay mas daghan kuno kini og ekipo kung itandi sa uban.

Kung tinuod nga mas daghan og ekipo ang Black pearl Security Agency, nan nganong ni-report man ang mga gwardya sa Kapitolyo ug South Bus Terminal nga walay mga armas?

Nganong wala may mga armas ang nadistino sa Badian, Malabuyok ug Bantayan?

Dili ba ang ekipo man maoy ilang nadag-an sa bidding? Apan dili kaha nga ang maong mga ekipo kutob ra sa papel apan wala sa aktwal? Padayon ba gihapon ang gihimo sa mga korap nga politiko kaniadto nga kompleto ang sementado nga kalsada sa papel, apan way nakita nga aktwal nga kalsada? Sige pa ba diay kini sa daang matuwid?

Dili ba apil sa kuwalipikasyon sa Bids And Awards Committee (BAC) sa Kapitolyo nga ang makaapil sa bidding mao kadtong security agency nga nakahimo na og operate sa ilang negosyo ug labing menus lima ka tuig?

Nganong nakalusot man ang Black Pearl nga niadto pa mang Nobiyembre 25, 2013 nakakuha kini og license to operate? Tinuod kaha nga niagi sa saktong proseso ang pag-operate sa Black Pearl?

Sa kadaghang kakulian niining Black Pearl Security Agency, nganong ipamugos man gyud kini nga maoy moserbisyo sa siguridad sa Kapitolyo? Kinsa ba ang nagpaluyo niini diha sa Kapitolyo? Sa 206 ka ulo sa gwardya, pila kahay bahin sa nangusog niini?

Maayong susihon kini sa atong gituohang ligdong nga gobernador.