DEAR Papa Joe,
Tawga lang ko sa ngalan nga Lyza, 23 years old, taga Cebu City. Ang akong suliran mahitungod sa akong lovelife. Sayo ko nga nisulod sa uyab-uyab, mga 2nd year high school, sa lalaki nga hangtod karon ako lang gihapong uyab.
Wala man sab ko pugngi sa akong mga ginikanan nga mag-uyab-uyab dihang bata pa ko. In fact pinangga nila ang lalaki ug silingan ra sad ni namo. Mao nga amo sab gisuklian og tinarong ang among mga ginikanan para dili sila mapakyas. Middle class lang si Boyet.
Mao na iyang angga ug kami usab middle class ra sab pero naninguha ang akong mga ginikanan nga makahuman ko sa kurso nga Nursing. Kay daghan man sila nga igsuon, si Boyet nakahuman lang og vocational course nga radio technician. Dinhi nagsugod ang among kalbaryo kay karon nga nag work na ko isip nurse, gisugdan na nila ni Mama ug Papa og kontra si Boyet. Maorag ila ko nga gi-discourage nga wa kuno koy ugma ning tawhana. Usahay kay di na nila papamisitahon sa balay. Nausab ang akong mga ginikanan ug si Boyet nasakitan na kaayo. Niingon siya nga magbuwag na lang mi kay total gusto man sa akong mga ginikanan, labi na nga palargahon ko sa gawas. Unsa may akong buhaton? Palihug tambagi ko.
LYZA
Lyza,
Nakasabot ko sa side sa imong mga ginikanan nga gusto nila nga maayo ang imong future ug gihatag nila nimo ang kalipay dihang bata pa mo.
Karon nakita nila nga sa gamayng sayop sa imong desisyon, maguba ang imong future. Ikaw na hinuoy provider kon magkadayon mo. Pero sila wala makasabot nimo kay ang ila rang gitan-aw mao ra gyud ang negatibong side sa imong uyab.
Dili sa tanang panahon nga kon ubos ang tawo og profession diha na lang siya kutob. Wala nila makita nga pwede mo-abroad si Boyet. Walay garantiya nga maayo og trabaho ang pares nimo, molambo inyong relasyon kay ang kalibutan puno sa kausaban. Pero mas dako ang advantage kon may kaya ang imong pares. Kon tinuod mong nahigugma sa usag usa, fight for it. Ipakita nila nga sayop sila. Ingna imong uyab nga challenge na ug kon iya nang malabang, mapasigarbuhon siya sa epekto niana. Salamat.
PAPA JOE
(sa inyong tampo ipadala lang sa papajoelon@hotmail.ph)