DUHA ka pamaagi ang kasagaran himuon aron makombinsi ang tawo. Una dinhi ang appeal to reason. Ug ang ikaduha mao ang appeal to emotion.

Sa appeal to reason, barugan nga husto ang baruganan tungod sa mga nagkadaiyang rason subay sa balaod. Apan kasagaran ning maong paagiha, mosamot hinuon pagsilaob ang panagbangi kay duna man say katarungan ang uban.

Ang appeal to emotion maoy kasagaran himuon pagkombinse sa tawo aron di masilo. Sa laktod, di sila masuko tungod kay gipunting dinhi mao ang ilang emosyon. Ug kon maigo ang emosyon, makuha sa tawo ang simpatiya sa uban.

Mao kini ang akong nakita nga paagi ni Senator Ramon "Bong" Revilla Jr. niadtong Lunes atol sa iyang privilege speech sa Senado.

Sa akong namatikdan, lahi ang unod sa iyang speech karon kay pulos pagpaubos ang iyang gihimo.

Wa akoy nakadungog nga mibungat siya og hait nga pulong ngadto kang Presidente Noynoy Aquino. Nanawagan pa siya sa pangulo nga himuon ang nasudnong panaghiusa, ihunong na ang panagbangi. Sa laktod, iyang gipakonsensya ang pangulo.

Wa gani niya gibatikos ang mga kaubanang senador nga vocal kaayo nga miduot kaniya, uban sila Senador Juan Ponce Enrile ug Jinggoy Estrada.

Kamatuoran niini, duna siyay mga nindot nga mensahe sa tanang senador, supporters, ug nagpasalamat pa siya sa katawhang Filipino.

Ug, daw nahimong entertainment ang iyang privilege speech dihang gipakita ang audio visual presentation sa iyang mga nahimo isip senador.

Tungod sa iyang gihimo, dunay mga Filipino nga naluoy kaniya. Natural nga mobati kita og kaluoy tungod kay di lalim ang kauwawan nga naangkon sa iyang pamilya.

Di ikalimod nga sa gihimo ni Revilla naigo ang emosyon sa 20-milyones ka mga Filipino nga miboto kaniya, busa nagtuo ako nga naluoy sila sa senador.

Ug bisan pa man kon tinuod nga sila Revilla, Enrile ug Estrada maoy nagwaldas sa binilyon nga buhis natong mga Filipino, apan gikinahanglan gihapon nila ang atong pagsabot.

Gikinahanglan usab nila ang patas nga pagtaral sa ilang kaso tungod kay dako pa kining latugiunon sa korte. Ug labaw sa tanan, di unta sila lamang ang gukdon sanglit duna man say mga kaalyado sa pangulo nga nalambigit sa maong eskandalo.

Nanghinaut ako nga silang tanan silutan subay sa balaod ug di pinaagi sa trial by publicity nga maoy sagad gihimo sa dunay ambisyon karong eleksyon.