COTABATO CITY -- Kritikal ang kahimtang sa usa ka mananagat human siya nabuthan og dinamita alas 4:20 sa hapon niadtong Lunes.

Giila ang biktima nga mao si Solungon Inon, 44, minyo ug molupyo sa Purok 4, Barangay Kalanganan Dos.

Gibutyag ni Cotabato City Police Office Director Rolen Balquin nga naggama og dinamita si Inon kilid sa iyang bay sa diha nga aksidente kining mibuto.

Gisapupo dayon ang mangingisda sa iyang pamilya ug gidala sa Cotabato Regional and Medical Center.

Ang biktima anaa sa talandugong kahimtang human makaangkon og daghang mga samad ug paso sa nagkadaiyang bahin sa lawas.

Nasayran nga dugay na nga nagpagawas og kamandoan si Cotabato City Mayor Japal Guiani nga gidili ang paggamit og dinamita sa pagpangisda apan dunay uban nga nagmagahi sa pagsunod niini hinungdan sa pagkaangol sa biktima.

Sa kasamtangan, nagpadayon ang imbestigasyon sa kapulisan sa hitabo samtang nagpadayon sab ang ilang operasyon batok sa mga mangingisda nga nagagamit og mga dinamita. (Edgar Fuerzas)