DUHA ka mga tulisan ang malampusong nasikop sa kapulisan pinaagi sa tabang sa nagpakabanang katawhan human gitulis ang Central Convenience Store alas 4:15 sa kaadlawon kagahapon, Martes, ning siyudad sa Davao.
Mga suspek malampusong misud sa maong tindahan didto sa Quimpo Boulevard apan nasikop sab dayon sila likod sa Davao City Recreation Center (kanhi Almendras Gym) kilid sa Islamic Center sa Barangay 39-D Poblacion.
Giposasan mao sila Abdulrasid Leong Langalen, 20, ulitawo, lumad nga taga General SK Pendatun, Maguindanao, ug Omar Baumol Ponte, 19, lumad nga taga Lampangog, Sultan Kudarat.
Sila Langalen ug Ponte pulos security guard ug temporaryong nagpuyo sa Barangay 39-D.
Base sa impormasyon nga nakalap sa Superbalita gikan sa Talomo Police Station, tulo ka mga lalaki nga armado ang mitulis sa maong tindahan.
Usa sa mga suspek mition og pistola sa kahera kinsa daling nakahipus sa kwarta gikan sa iyang kaha.
Sa pag-abli sa mga tulisan sa kaha, P500 na lamang ang nabilin mao nga ila na lang gidaginot.
Sumala sa kahera nga naratol ang tulo ka mga lalaki dihang usa sa ilang mga staff sa tindahan midagan ug mitawag og pulis hinungdan nga dali silang misibat padung sa Juna Subdivision.
Sa gihimong follow-up operation sa kapulisan sa Talomo uban sa Special Weapons and Tactics (Swat) Team nga gipangulohan ni DCPO Director Vicente D. Danao Jr., malampusong nasikop ang duha sa tulo ka mga suspek.
Alas 7:10 sa buntag kagahapon nahimong tensiyonado ang Rotonda-Magallanes Street ug Quimpo-San Pedro Extension human gisikop sa mga pulis ang duha ka mga suspek.
Nakuha sa ilang posisyon ang .38 kalibre nga revolver, .45 kalibre nga pistola, granada, upat ka mga bala, duha ka cellphone, mga gamit sa sekyu, ug duha ka pakite sa gituohang shabu.
Unang gibalhog sa selda sa Talomo ang duha ka suspek dayon giatubang kini kang Danao.
Sa kasamtangan, padayon ang gihimong manhunt operation sa kapulisan sa usa pa ka suspek nga nakasibat.
Kasong robbery ang giandam sa kapulisan aron ipasaka batok sa mga suspek.