SIKOP sa entrapment operation ang usa ka iladong suspetsadong drug pusher nga nalambigit sa pagpayuhot sa illegal nga druga sa mga hot spots area sa siyudad sa Cagayan de Oro niadtong niaging adlaw mga alas 4:00 sa hapon sa Mabini-Burgos St.
Sa direkta nga superbisyon ni Police Superintendent Aaron M. Mandia, CPSC operatives, malampuson nga nasikop si Fahad Macaayong, 31, nga nagpuyo sa Villa Angela Subdivision ning siyudad.
Nasuta nga aduna na usab kini kanhi kaso ang Violation of Republic Act 9165 nga gidungog sa 10th Judicial Region of Regional Trial Court (RTC) sa Misamis Oriental, Branch 40, ning siyudad.
Nakuha sa posisyon sa suspetsado ang isa ka pakete nga transparent cellophane nga gi-seal pinaagi sa pagsunog niini ug adunay sulod nga white crystalline substance nga gituohang shabu nga gituohan usab nga mokantidad og 20 mil ka pesos.
Nakuha usab gikan sa suspetsado ang usa ka motorsiklo nga Yamaha nga walay plaka ug nakuha gikan sa utility box sa naasoy nga motor ang paraphernalia sa maong ginadiling druga ug usa ka sachet nga gituohan usab nga shabu.
Ang City Public Safety Company Operatives padayon nga gisuta kon ang naasoy nga motorsiklo kinawat ba tungod kay walay naipakita nga mga papeles pagmatuod nga iya kini sa suspetsado.
Ang mga nakuhang gituohang shabu gikan sa suspetsado gidala na sa Philippine National Police Crime lab alang sa mga ipahigayong eksaminasyon.
Ang suspetsado kasamtangang detinado sa Maharlika Dentention Cell ug andam na ang ipasakang kaso batok kaniya. (KSC)