NAPUTOL ang dalunggan ug ubay-ubay nga samad ang naangkon sa usa ka lalaki human kini gibunalan sa gituohang kawatan mga alas 11:00 sa gabii niadtong nilabayng adlaw.

Ang biktima naila sa ngalan nga si Allan Rasal, 44, minyo ug lumulupyo sa Purok 6, Villanueva, Misamis Oriental.

Nasayran nga samtang mangatulog na unta kining biktima kalit lamang nga mipiyait ang ilang binuhing baboy.

Kumpiyansang mikanaog ang biktima aron sa pagsuta kung naunsa kini apan sa dihang anaa na siya sa gawas kalit kining gibunalan sa wala mailhing suspetsado ug wala usab masayri kon unsa ang gigamit sa pagbunal niini.

Nakaangkon ang biktima og samad sa iyang ulo ug nawong, nihubag ang tuo nga bahin sa mata ug nawad-an ug isa ka dalunggan sa tuong bahin ang maong biktima tungod sa pagbunal-bunal.

Sa pagsulat ning balita, kasamtangang giatiman pa sa mga doktor sa Northern Mindanao Medical Center ning siyudad sa Cagayan de Oro ang maong biktima.