HINGPIT nang mi-inhibit kun nibuhi sa pagpahigayon ug preliminary investigation ang Provincial Prosecutor’s Office, labot sa mga kasong multiple ug frustrated murder nga gipasaka batok sa mga personahe sa Highway Patrol Group, nga gilambigit sa kamatayon ni Atty. Noel Archival.
Unang niduso ug motion for voluntary inhibition ang mga sinumbong tungod sa pagtuo nga dili sila makakuha og patas nga imbestigasyon dinhi sa Sugbo tungod sa ka-impluwensiyado sa pamilyang Archival.
Tungod sa maong mosyon, gitumbok sa Provincial Prosecutor’s Office nga susama og wala gyuy pagsalig ang mga HPG personnel sa ilang katakos pagpahigayon og preliminary investigation, hinungdan nga mobuhi nalang gyud sila sa kaso.
Giklaro ni Provincial Prosecutor Pepita Jane Petralba nga walay legal nga basehanan ang inhibition sa 5-man panel ug sa tibuok nilang opisina kon dili tungod lang sa kakuwang og pagsalig usa ka kampo ngadto nila.
Ang mga HPG personnel, pinaagi sa usa sa ilang mga abogado, Hazan Bargamento, mipadayag ug kalipay sa maong kalambuan.
Malaumon siya nga ang DOJ- Manila, mopabor sab sa ilang tinguha nga adto na’s kauluhan ipahigayon ang preliminary investigation o di ba kaha motudlo nalang kini ug lain piskal nga dili taga-Sugbo, nga maoy mosusi sa kaso.
Human gibuhian ang kaso sa provincial prosecutor’s office, ang Regional State Prosecutor nga si Fernando Gubalane mao na sab karon ang kinahanglang modesisyon kung kinsa ang mopahigayon sa preliminary investigation sa mga kaso batok sa mga personahe sa HPG7.