MISUGYOT og laing rota ang Movement for Livable Cebu nga agian sa Bus Rapid Transit sa higayon ipatuman na sa dakbayan sa Sugbo.

Ang National Economic and Development Authority (NEDA) Board bag-uhay lang niaprobar sa BRT nga ang orihinal nga rota manukad gikan sa Bulacao pai­ngon sa Talamban, agi sa Natalio Bacalso Ave., Osmeña Blvd., (Jones Avenue), dan Escario sa Barangay Camputhaw, Archbishop Reyes Ave., hangtod sa Talamban area.

Apan si Rudy Alix, usa sa mga convenor sa MLC, nisugyot nga inay sa maong rota, mas maayo ug daghan ang makabene­pisyo kon ang BRT gikan sa Bulacao paingon sa N. Bacalso Ave., anha moagi ug mosulod sa P. del Rosario hangtod sa M.J. Cuenco ug paingon na sa amihanang bahin sa siyudad sa Sugbo.

Matod niya mas nin­­dot nga agian ang rota nga ilang gisugyot tu­ngod kay daghan ang mga eskwelahan, mga lugar nga trabahoan, establisimento ug residensya ang malabyan sa

BRT.

Atol sa 888 News Forum sa Marco Polo Plaza kagahapon, si Alix nipasabot nga base sa gipahigayon nga population density studies sa ilang kaubanan sa MLC nga mga urban planner, mas daghang mga pasahero ang manakay sa mga rota nga ilang gisugyot.

Gawas niini, siya na­mahayag nga kon kinsa ang mo-operate sa BRT seguradong mokita sa rota nga ilang gisugyot kon itandi sa rota nga gisugyot sa mga nagpaluyo sa proyekto diin diyotay lang ang mga pasahero nga manakay.

“Masa gyud ang maka-benefit,” pahayag ni Alix.

Siya niingon nga mag­­lisod ang BRT kon anha moagi sa Banilad-Talamban road tungod sa presensiya sa mga flyover nga kon panahon sa paghuot sa trapiko, mabara ang BRT tungod kay ang dalan nga subayon niini anaa sa tunga sa lane.

Si Alix nidugang ang Jones Avenue agianan sa mga middle ug upper income nga mga tawo kon itandi sa M.J. Cuenco diin daghang nanimuyo nga masa.

“It should go to another rota where population is highest and where great number of establishments is located and where people pass through” dugang niya sa pakighinabi sa mga tigbalita.

Siya nitataw nga wa sila mosaway sa proyekto apan gusto nila nga mapahimuslan kini sa masa nga mao ang katuyoan sa BRT.

“This project has two sides, the negative and the positive side. The negative side is there’s a danger that this might become a white elephant in our midst. On the positive side, this would be a testament to us genuine people,” pagpasabot ni Alix.

Tinguha nila nga ma­kigdayalogo sa kompa­ni­ya nga modaug sa bidding nga maoy mo­dumala ug mopadagan sa BRT system aron ipaabot ang ilang sugyot alang sa kaayohan sa proyekto.