DINHI sa dakbayan sa Dabaw, sayud na man kita nga kusog kaayo ang implementasyon sa pagpatuman sa kahusay ug kaangayan.
Dili makalusot (apan kon duna may makalusot talagsa ra) kini tungod kay taas na kaayo og moral ang atong mga awtoridad. Dako gayud og kalahian kaniadto ug karon. Kini tungod sa liderato ni Mayor Rody Duterte.
Nasulti nako ni dili tungod kay siya akong boss apan kini atong makita dungan sa kalamboan nga naangkon sa Davao City karon.
Dili pa lamang dugay, may taxi driver na usab nga nadakpan tungod kay naghimo og modus operandi batok sa ilang mga pasahero.
Busa dili nato malikayan nga dunay mga taxi driver nga gipatay tungod kay nagminarama. Dili lang panginabuhi ang ilang tinguha, apan naa pay mas labaw nga tuyo nganong misulod sila pagka-driver sa taxi. Tungod niini, nagduda na hinuon ko nga gihimo lang nilang dummy ang ilang propesyon apan gamit usab kini sila sa sindikato, sama sa tigdala og druga ug uban pang ilegal nga binuhatan.
Sa dihang dunay nadakpan nga taxi driver nga nagbinuang sa iyang pasahero ug gipresentar kang Mayor Rody, akong gipakita sa Facebook ang larawan niini ug ang sagad sa komentaryo nga akong nadawat kutob sa nakakita niini, ilang gisulti nga gaba, mayra ug uban pang laksot nga komentaryo batok sa mga driver.
Dili tanan driver ang ingon niini, apan kon dunay mga driver nga sama niini dali rang mabantayan tungod kay dili na mahadlok ang mga biktima nga mosumbong sa atong kapulisan kay nahibalo silang dili paminawon sila niini ug wala na kadtong mga awtoridad nga maoy nagapaluyo sa mga kriminal.
Unta dili lang marama nga driver ang silotan, apan lakip usab unta kining mga operators nga wala magpakabana sa pagpili og mga tawo nga ilang saligan sa ilang mga yunit.
I-background check nila kon unsang kaliwata ug kanhi binuhatan sa maong tawo ug kinahanglan dunay iladong tawo nga morekomendar nga kini nga driver maayo og record.
Kinahanglang mopasa usab sila og sertipikasyon nga gitawag og Good Manners and Right Conduct (GMRC), pangitaan og NBI records, police clearance ug uban pang dokumento nga magpamatuod nga kasaligan silang driver.
Ang mga taxi driver usa sa mga importanteng mga instrumento aron mopaila sa dagway sa siyudad. Salaon ang mga driver sa taxi, record ug ang ilang kahinlo sa panglawas. Ngil-ad pa og record hugaw pa gyud. Bato-bato sa langit ang maigo bahala na mo masuko.
Mabuhay ang adlaw sa Kagawasan!!!