ANGAY nga klaruhon sa kapulisan ang pasangil nga pag-spray og kemikal ug pagtulis sa usa ka drayber sa taksi sa iya mismong pasahero niadtong milabay nga semana.

Kini human, matud pa, milutaw nga di diay tinuod ang pasangil sa pasahero ngadto sa drayber.

Mitiyabaw intawon ang mga kabanay ni Santos Descallar Diez, drayber sa Krizia Taxi sa gipasangil sa iyang pasahero nga usa ka Jesus Famacion Dizon II, nagpailang usa ka pastor.

Matud sa asawa ni Diez nga imposible matud pang himuon kini sa iyang bana tungod kay 19 na ka tuig na siyang nag-drayb og taksi ug tanang mabilin nga butang sud sa iyang sakyanan, iuli niya sa tag-iya.

Gikakurat sab kini sa mga kaubanang drayber sa taksi ni Diez sa kompaniya nga iyang gialagaran. Ilang gisulti nga buotan ang drayber ug di niya mahimo ang gipasangil kaniya.

Gani mismo si Diez mipatim-aw sa presinto sa pulis niadtong Lunes aron nga ipanghimakak ang pasangil ngadto kaniya.

Ang problema kay napasakaan na og kaso sa kapulisan ang drayber ngadto sa piskalya niadtong Lunes nga di pa man diay klaro ang mga ebidensiya.

Ang mga taksi drayber dinhi sa siyudad matawag natong "front liner" sa mga turistang moari sa Davao. Sila maoy naa sa atubangan sa mga ganghaan sa airport ug pantalan aron nga maoy modala sa mga bisita, di lang mga Pinoy apan mga langyaw, padung sa ilang mga destinasyon sa dakbayan.

Daghan man god ang nagduda nga basin og nagtumo-tumo lang og istorya ang pasahero aron nga dauton ang imahe sa siyudad sa Davao, ilabi na gyud ang kahapsay ug kalinaw dinhi.