GIPAKURATAN sa San Antonio Spurs ang defending champion Miami Heat human gitambakan sa Game 3 sa NBA finals, 111-92, kagahapon.

Migana og maayo ang nindot nga opensa sa Spurs sa first half pa lang sa duwa kay mitala na og record sa NBA finals history isip "best shooting half."

Nasulod sa Spurs ang 19 nga tira sa 21 sa pagsulay og buslo.

Ang kanhi nga dunay gunit nga rekord kay ang Orlando Magic nga nakahimo niini niadto pang tuig 2009 batok sa Los Angeles Lakers nga may 75 percent best shooting record.

Miulan og puntos gikan sa forward nga si Kawhi Leonard nga miabot og 16 puntos sa first quarter pa lang ug sa kinatibuk-an kay mihuman siya og 29 puntos isip leading scorer sa Spurs.

Sumala pa nga nahimong dako ang tabang ni Leonard sa daug sa tim tungod mas ubos ang performance sa opensa sa giilang "big three" sa Spurs nga sila Tony Parker nga may 15 puntos, Tim Duncan nga mikamada lang og 14 puntos samtang si Manu Ginobili mihimo og kinatibuk-ang 11 puntos.

Sa bahin sa Miami, parehong may tag-22 puntos sila Lebron James ug Dwayne Wade.

Namatikdan nga daghang turnover ang Miami nga miabot sa 20 ka higayon kumpara sa Spurs nga 12 lang.

Ugmang adlawa, sulayan sa Miami nga matabla ang serye nga himuon ang Game 4 sa ilang homecourt gihapon.