MALITA, Davao Occidental - Suwerteng nadala pa sa balay tambalanan ang usa ka ginang nga gipusil sa iyang bana human naglalis didto sa ilang balay sa Sitio San Miguel, Barangay Poblacion, alas 10:00 sa gabii, Martes.

Si Elena Villamor, 33, napusilan sa tuong bahin sa dalunggan hinungdan nga gidali pagdala sa Malita District Hospital.

Human sa insidente boluntaryong mitahan ang suspek nga si Alito Villamor, 47, ngadto sa kapulisan ug gipriso.

Ang biktima gibalhin na ngadto sa Davao del Sur Provincial Hospital alang sa dugang pagtambal.

Matud ni Police Officer 2 (PO2) Fe Flores-Gamboa, imbestigador sa kapulisan, narekober nila ang upat ka mga buhing bala ug usa ka bala sa nakabuto nga kalibre .357 sa balay.

Gidason sa pulis nga selos maoy nahimong pabilo kon nganong diriyot mapatay sa suspek ang kaugalingong asawa.

Hinuon, gihikay na sa kapulisan ang tukmang kaso batok sa bana.