GIKOMPIRMAR sa Malacañang kagahapon nga gipirmahan na ni President Benigno Aquino III ang Republic Act 10636, nga naghatag og Filipino citizenship ngadto kang Brooklyn Nets centerAndray Blatche.
Mismong si Gilas Pilipinas head coach Chot Reyes maoy mipagawas ning maong taho nga gikompirmar sab dayon ni Presidential spokesperson Edwin Lacierda.
Ning maong kalambuan, segurado na ang pagduwa ni Blatche sa Gilas alang sa dagkong mga kompetisyon sa umaabot nga mao ang FIBA World Cup karong Agusto ug Asian Games karong Septiyembre.
Si Blatche maoy ikaduhang naturalized player nga sakop sa Gilas sunod ni Marcous Douthit, kanhi magduduwa sa Los Angeles Lakers.
Niadtong Martes, si Blatche mitan-aw og duwa sa Philippine Basketball Association (PBA) sa Manila.
Sa usa ka interbyu, sagol komedyang miasoy si Blatche nga gikonsiderar niyang paryente si kanhi 8-time world boxing champion Manny Pacquiao.
“I have to see my family here. I have to see Manny Pacquiao,” asoy ni Blatche sa usa ka interbyu nga mogawas sa artikulo sa www.interaksyon.com
Nagkanayon si Blatche nga mapasalamaton siya sa mainitong paghangop sa mga Pinoy ngadto kaniya.